Градоначалничката на Осло, Ен Линдбое, предупреди дека шверцерите на дрога се повеќе го таргетираат норвешкиот главен град како порта кон Европа, бидејќи властите ги зајакнуваат контролите во големите пристаништа како Антверпен.
Линдбое рече дека дрогата вредна повеќе од 600 милиони евра била шверцувана преку најголемото пристаниште во Норвешка, кое секоја недела прима меѓу 50 и 70 бродови и 243.000 контејнери.
– Се чини дека пристаништето во Осло станува омилено пристаниште во Европа за закоравените банди – изјави Линдбое за телевизиската станица НРК, пренесува Гардијан. Таа смета дека пристаништето е „премногу слабо чувано“.
На почетокот на овој месец, царинските службеници во Антверпен, главниот град на трговијата со дрога на Европа, изјавија дека заплените на кокаин во белгиското пристаниште се преполовиле бидејќи бандите ги менувале рутите за да избегнат откривање по зголемениот полициски надзор.
Во Осло, сепак, постои загриженост дека безбедноста не е доволно силна. Норвешката царинска унија вели дека има само еден мобилен скенер во Осло, кој е споделен со две други пристаништа. Кога го нема, цариниците мора да ги проверуваат контејнерите со рачни скенери, за кои велат дека не се толку ефикасни.
Повикувајќи на акција, синдикалната лидерка Карин Тандеро Шауг рече дека ситуацијата во врска со кокаинот и организираниот криминал е „критична“ и дека е важно „да се зајакне царината во Норвешка“.
– Оваа борба е многу важна. Не можеме да си дозволиме да ја потцениме важноста на граничната контрола – додаде таа.
Помеѓу младите, Норвешка има трета најголема потрошувачка на кокаин во Европа. Минатата година, норвешката царина извршила 1.847 заплени на дрога, повеќе отколку во претходните 10 години заедно, вклучувајќи рекордни количества кокаин.
– Количината на кокаин во Осло е „алармантна и расте“, рече Тандеро Шауг, повикувајќи ја норвешката влада да дејствува.
– Кога ќе има поголема контрола и полиција во Антверпен, криминалците ќе ги сменат правците. А, Норвешка лесно може да стане транзитна земја. Истото важи и за Шведска – заклучува Шауг.
