ДЗСИ утврди пропусти на Детската клиника во случајот со смртта на седуммесечното бебе

Пропусти повторно се утврдени на Дестката клиника од страна на здравствениот инспекторат, по извршениот надзор за случајот со смртта на седум месечното бебе.

На клиниката сеуште не е решен проблемот со задолжително присуство на специјалист во дежурната амбуланта, а за кое веќе се води прекршочна постапка. И понатаму медицинска документација се креира од доктори кои не се присутни на работа за што и претходно беше издадено решение од инспекторатот, се вели во извештајот на ДЗСИ. Констатирани се неправилности и во евиденцијата за прием на пациенти.

„Доколку прием не е извршен, установата е должна да издаде писмено образложение за причините за одбивањето на приемот за болничко лекување. Наведената законска обврска е казнива согласно член 306 од Законот за здравствената заштита заради што ДСЗИ ќе спроведе нова постапка за порамнување према правното лице ЈЗУ УК за дeтски болести како и против одговорното лице во установата.“ – ДЗСИ.

Министерот за здравство за ТВ 24 потврди дека стручна комисија ќе проверува дали имало и стручни пропусти во лекувањето на детето.

Ова е четврти смртен случај на Детска клиника во изминативе неколку месеци за кој се покренува вонреден надзор. Претходно организациски, но и стручни пропусти беа откриени и во случајот со 14-месечно бебе кое почина од бронхопневмонија откако беше одбиено за хоспитализација иако родителите барале помош во две болници. За овој случај, Комисијата при Министерството за здравство утврди дека и на Детската и во клиниката Козле бил направен превид во проценките за здравствената состојба на бебето.