Државната награда „Блаже Конески“ за првпат треба да се додели оваа година?!

80

Претседателот на Собранието, Африм Гаши, искажал уверување дека Предлог-законот за изменување и дополнување на Законот за државни награди, годинава ќе биде благовремено донесен од Собранието, при што ќе бидат формирани и соодветни комисии и ќе бидат распишани конкурси. „И за првпат во 2025 година ќе бидат доделени наградите ‘Блаже Конески’, на 19 декември, и наградата ‘Ремзи Несими’ на 25 декември, на нивните родендени“, вели во разговор за весникот ВЕЧЕР, Атанас Конески, секретар на КЕЦ „Небрегово“

На почетокот на март годинава се забрзаа активностите околу Законот за изменување и дополнување на законот за државни награди со којшто треба да се воведе државна награда која го носи името на Блаже Конески, вели во разговор за весникот ВЕЧЕР, Атанас Конески, секретар на КЕЦ „Небрегово“. Станува збор за Предлог-законот за изменување и дополнување на Законот за државните награди, со којшто се предвидува востановување на две нови државни награди, „Блаже Конески“ и „Ремзи Несими“, а што на седница на Собранието на РСМ беше ставен на дневен ред во мај 2023 година.

Работна средба со претседателот на Собранието Африм Гаши

Како што посочува Атанас Конески, на 4 март годинава во Собранието се одржала средба на која, покрај секретарот на КЕЦ „Небрегово“, учествувале и Весна Мојсова-Чепишевска од Филолошкиот факултет „Блаже Конески“ – Скопје, Африм Гаши, претседател на Собранието и Никола Ѓошевски, заменик-секретар на Собранието.

На средбата, вели Атанас Конески, претседателот на Собранието Гаши искажал уверување дека Предлог-законот за изменување и дополнување на Законот за државни награди годинава ќе биде благовремено донесен од Собранието, при што ќе бидат формирани и соодветни комисии и ќе бидат распишани конкурси. „И за првпат во 2025 година ќе бидат доделени наградите ‘Блаже Конески’ на 19 декември и наградата ‘Ремзи Несими’ на 25 декември, на нивните родендени“, вели Конески.

Тој во разговорот нè запозна и со годинашните активности на КЕЦ „Небрегово“.

Потсети дека на 2 април се навршија четири години од смртта на проф. д-р Трајко Стаматоски (1925 – 2021), кој беше од првата генерација македонисти. Како што истакна Конески, во рамките на годинешната програма на КЕЦ „Небрегово“, во мај ќе се одбележи и 100-годишнината од раѓањето на Трајко Стаматоски, кој воедно беше и првиот и доживотен претседател на Фондацијата „Небрегово“, која од неодамна се преименува во Културно-едукативен центар (КЕЦ).

Воедно, за годинава ги најави и одбележувањата на 80 години Азбука и Правопис на македонскиот стандарден јазик, како и 25 години од Фондација/КЕЦ „Небрегово“ и 20 години Спомен-дом „Блаже Конески“. По тој повод, во библиотеката „Борка Талески“ во Прилеп, на 26 мај, ќе се одржи промоција на книгата „Ех, Конески“ од Марија Симоноска.

Заеднички состанок на Деканската управа на Филолошкиот факултет „Блаже Конески“ и Управниот одбор на КЕЦ „Небрегово“

Како што информираше тој, и годинава на 5 септември во Спомен-домот „Блаже Конески“ во Небрегово, што станува веќе традиција, ќе се одржи промоција на книга, која во 2025 е насловена „80 години Азбука и Правопис на македонскиот стандарден јазик“. Книгата, издание на КЕЦ „Небрегово“, содржи текстови од повеќе автори напишани по повод одбележувањето на овој голем јубилеј. Како што истакна, текстовите се пристигнати на конкурс што лани во септември беше распишан, а на кој имало значителен одѕив. Пријавени биле 25 трудови од исто толку автори и тоа од професори, студенти и ученици од Филолошкиот факултет „Блаже Конески“ – Скопје, Институтот за македонски јазик, Институтот за македонска литература, од Педагошките факултети во Скопје и Битола, Филолошкиот факултет од Штип, како и гимназијата „Јосип Броз – Тито“ од Скопје и МСУ „Гаврило Романович Державин“ од Свети Николе.

Собрание на КЕЦ „Небрегово“

Конески ја најави и традиционалната културно-туристичка манифестација „Зборот на Конески – Гајдата на Пеце“, што треба да се одржи во Небрегово, на 6 септември 2025.

Да потсетиме, досега Фондацијата, односно КЕЦ „Небрегово“ има објавено 18 книги во кои се поместени 616 автори на 2.572 страници.

Како што истакна Атанас Конески: „Блаже Конески си создаде соѕвездие и затоа неговиот збор има одек во иднината“. (Н.И.Т.)

ИЗДВОЕНИ