„Договорот за прекин на огнот е во завршна фаза“, се огласи Хамас

Палестинското милитантно движење Хамас денеска соопшти дека договорот за прекин на огнот и размена на заробеници со Израел е во завршна фаза.

„Раководството на движењето одржа серија состаноци и консултации со лидерите на палестинските фракции во врска со напредокот на тековните преговори во Доха“, се вели во соопштението на милитантната група, според Ал Масира.

Хамас вели дека ги информирал палестинските фракции за „постигнатиот напредок“ и дека консултациите ќе продолжат се додека не се склучи договор за прекин на огнот. Во соопштението се наведува дека лидерите на палестинските сили и фракции го изразиле своето задоволство за време на преговорите во Доха, како и очекување дека „оваа рунда преговори ќе заврши со јасен и сеопфатен договор“.

„Палестинските комитети на отпорот, од своја страна, го изразија своето задоволство од забележливиот и позитивен напредок што е постигнат досега во завршувањето на првата фаза од преговорите на начин кој им служи на интересите на палестинскиот народ за да се запре ционистичкиот масакр и војната за уништување, односно запирање на трагедиите кои се резултат на ционистичкиот холокауст“, соопшти Хамас.