И 22 години по неговото пензионирање, легендарниот кошаркар Џон Стоктон сè уште е рекордер во НБА лигата по бројот на асистенции (15.806) и украдени топки (3.265). Веројатно тоа ќе продолжи уште долго, бидејќи води далеку пред сите активни спортисти, а најблизу до него во моментот се 40-годишниот Крис Пол (12.370 асистенции) и 40-годишниот Леброн Џејмс (11.487 асистенции), додека на листата на „крадци“ е Крис Пол со 2692.
Стоктон целата своја кошаркарска кариера ја помина во Јута, за која настапуваше од 1984 до 2003 година, со просек од 13,1 поен и 10,5 асистенции по натпревар. Тој е еден од најдобрите плејмејкери на сите времиња, но така не мисли и Вернон Максвел, кој истакна дека Стоктон е еден од најлошите со кои се соочил во лигата.
Максвел играше за голем број НБА тимови од 1988 до 2001 година и имаше просек од 12,8 поени по натпревар. Неговите најзабележителни моменти беа како член на Хјустон, со кој освои прстен во 1994 и 1995 година. Стоктон е меѓу најдобрите без освоен трофеј, како и неговиот долгогодишен соиграч Карл Мелоун, потоа Чарлс Баркли, Патрик Евинг, Реџи Милер, Ален Ајверсон…
За Максвел, Стоктон е нешто друго.
- Еден од највалканите играчи на сите времиња. Низок играч кој изгледа како поштенско сандаче и е многу валкан. Тој е куче, демон. Одвратен е, истакна Максвел, кој не ги поштеди ниту обожавателите на Јута.
- Тие се еден куп селјаци. Сè што некогаш истакнуваа беше мојата боја на кожа, зборуваа за мајка ми, баба ми, сопругата и за моите деца. Секогаш истакнуваа дека сме црнци, и дека не треба никогаш да се зборува за нив, додава Максвел.
