Џенифер Гарнер изгуби пријателка во пожарот во ЛА: „Се чувствувам речиси виновна додека шетам низ мојата куќа“

Американската актерка Џенифер Гарнер изјави дека една нејзина пријателка загинала во пожарите во Лос Анџелес.

„Премногу е ужасно да се зборува…Не чувствувам дека треба да зборувам за неа, но да, изгубив пријателка кој не излезе на време“, изјави Гарнер за NBC.

Таа истакна дека може да „напише список од 100 пријатели кои ги загубија своите домови“, што, како што вели, прави да се „чуствува лошо“ бидејќи нејзината куќа досега била недопрена од пожарот.

„Се чувствувам речиси виновна додека шетам низ мојата куќа…Што можам да направам? Како можам да помогнам? Што можам да понудам? Што можам да понудам со овие раце и овие ѕидови и безбедноста што ја имам? Срцето ми крвари за моите пријатели. Можам да се сетам на 100 семејства и 5.000 изгубени домови“, додаде актерката.

Гарнер, која 25 години живее во населбата Пацифик Палисадес во Лос Анџелес, рече дека таа и Хозе Андрес, шефот на World Central Kitchen, која помогна во дистрибуцијата на оброците за време на трагедии низ целиот свет, се вклучија во обезбедувањето помош на оние на кои им е потребна уште во првиот час кога започна пожарот во Лос Анџелес.