Детали за огромниот руски напад на Украина: „Руска ракета прелета над Молдавија“

Рано утрово Русија изврши масовен ракетен и беспилотен напад врз Украина. Експлозиите одекнаа во голем број градови, а најтешко беше погоден Харков, со еден милион жители, каде Русите истрелаа 12 проектили.

Најмалку шест лица се ранети во нападите во Харков, а едно е убиено во областа Днепропетровск. Покрај тоа, половина милион луѓе останаа без струја, вода и греење во Харков на Божиќ.

Главната цел на масовниот руски напад беше украинскиот енергетски систем по 13-ти пат оваа година. Вкупно беа истрелани повеќе од 70 проектили и повеќе од 100 борбени беспилотни летала, објавија Украинците.

На нападот реагираше и украинскиот претседател Володимир Зеленски, кој го обвини рускиот претседател Владимир Путин дека намерно го наредил нападот на божиќното утро и прашува „дали има нешто посурово од тоа“.

Претседателката на Молдавија, Маја Санду, потврди дека еден од руските проектили влегол во воздушниот простор на земјата.