Русија безбедно го транспортираше соборениот сириски претседател Башар ал Асад, изјави рускиот заменик-министер за надворешни работи Сергеј Рјабков во интервју за NBC News.
Кремљ во понеделникот објави дека претседателот Владимир Путин одлучил да му даде азил на Асад во Русија.
„Тој е безбеден и тоа покажува дека Русија се однесува како што треба во вонредна ситуација“, изјави Рјабков за американскиот медиум. Тој додаде дека нема да елаборира „што се случило и како е тоа решено“.
На прашањето дали Русија ќе го предаде Асад на судење, Рјабков рече дека Русија не е страна на конвенцијата со која е основан Меѓународниот кривичен суд.
Рјабков додаде дека Русија „дефинитивно ќе биде подготвена да размисли“ за нова размена на затвореници, слична на онаа во август во која беше вклучен новинарот на Волстрит џурнал, Еван Гершкович.
„Нов договор би бил здрав чекор напред, особено на почетокот на следната администрација“, изјави Рјабков за Ен-Би-Си, додавајќи дека не би сакал ништо да прејудицира.
