„Искубаното министерско БМВ “ со демонтирани врати, извадени делови, брави, тапацир…

Левата предна врата и левото предно крило се демонтирани и на нивно место се монтирани врата и крило од некое друго возило. Извадени се оригинални делови и ставени се друга врата и крило во друга боја…, констатирале во извештајот службениците на Министерството за односи меѓу заедниците за службеното БМВ кое со месеци не е вратено од сервисот во Куманово. Во записникот за ова, кој до медиумите вчера заедно со фотографиите на возилото, го доставило Министерството, е наведено дека возилото вредно 60.000 евра е во исклучително лоша состојба.

-Моторот од возилото е отворен и се гледа дека му недостасуваат делови. Предниот браник е демонтиран, двете брави од лева и од десна страна се целосно извадени, а извадени се и тапацирите од двете врати од лева страна – наведоа службениците во записникот.

Во него е наведено дека возилото било оставено пред мај минатата година во авто сервисот „Авто лакер Буњо“ во Куманово поради сериозен дефект. Потоа, сервисот не го вратил возилото на Министерството и покрај ветувањата. Набрзо потоа сервисот воошто не одговарал на повиците. Поради тоа Министерството решило да испрати свои службеници да го лоцираат возилото.

Случајот во јавноста неодамна го изнесе министерот Иван Стоилковиќ кој наведе дека возилото на Министерството со кое претходно управувал Артан Груби било во катастрофална состојба.

– Возилото, кое било предадено на сервис, сега личи на „искубана кокошка“. Делови од него, вклучително и вратите, се извадени и користени за други потреби на сервисот. Министерството за внатрешни работи е веќе вклучено во истрагата, но нема записници за предавањето на возилото. Сведоците тврдат дека автомобилот бил предаден во совршена состојба – изјави тогаш Стоилковиќ. (Б.Ѓ.)