Демонстрации низ Словачка: Десетици илјади луѓе во Братислава бараат оставка од премиерот Роберт Фицо

Десетици илјади луѓе денеска учествуваа на новите демонстрации во Братислава, главниот град на Словачка, против премиерот Роберт Фицо, кој е критикуван за неговата проруска политика и обвинет за авторитаризам.

Фицо, кој ја предводи трипартиската коалиција, ги обвини противниците дека подготвуваат „државен удар“ во тензична атмосфера во време кога демонстрациите против него се шират во последните недели.

Толпа од околу 40.000 луѓе вееја словачки и европски знамиња се собраа во Братислава. Демонстрации се одржаа и во четириесетина градови низ државата.

Последниот бран на антивладини собири беше поттикнат од неодамнешното патување на Фицо во Москва на разговори со рускиот претседател Владимир Путин во ретката посета на Кремљ од страна на лидер на Европската унија откако Москва ја започна инвазијата на Украина на 24 февруари 2022 година, пишува агенцијата АП.

Неодамнешните изјави на Фицо дека надворешнополитичката ориентација на Словачка може да вклучува и напуштање на ЕУ и НАТО придонесоа за гневот на демонстрантите.

„Оставка, оставка“ беше пораката до премиерот и крикот дека Словачка е Европа.

Најновите протести се одржаа на 41 локација во Словачка, што е зголемување од 28 локации пред две недели и во уште 13 градови во странство, соопштија организаторите.

Ова се најголемите демонстрации од уличните протести во 2018 година, предизвикани од убиството на истражувачки новинар и неговата свршеница. Политичката криза што следеше доведе до колапс на претходната влада на Фицо.

Фицо, кој преживеа обид за атентат во мај 2024 година, ги подигна тензиите во земјата обвинувајќи ги организаторите на протестите дека биле во контакт со странци кои ги организирале неодамнешните антивладини протести во Грузија и кои се под контрола на украинските власти, за кои рече дека работеле на организирање државен удар во Словачка.

Фицо се врати на власт во 2023 година кога неговата левичарска партија Смер победи на парламентарните избори на проруска и антиамериканска платформа.

Оттогаш тој ја прекина воената помош на Словачка за Украина, ги критикуваше санкциите на ЕУ против Русија и рече дека ќе го блокира влезот на Украина во НАТО. Тој го прогласи украинскиот претседател за непријател кога Украина ја прекина испораката на руски гас за Словачка и некои други европски земји кои минуваат низ украинска територија.

„Ние ги браниме демократијата, слободата и човековите права како што ги гледа ЕУ и како што е напишано во нашиот Устав. Тука сме да го зачуваме“, изјави еден од демонстрантите за агенцијата Франс прес.

Откако се врати на власт по четврти пат во октомври 2023 година, Фицо, кој е еден од ретките лидери на ЕУ блиски до Кремљ, презеде мерки за зајакнување на врските со Москва и ја запре испораката на воена опрема за Украина.

Во декември тој отиде во Москва на средба со рускиот претседател Владимир Путин. За време на таа средба тој ја критикуваше одлуката на Украина да го запре транзитот на руски природен гас во Европа преку нејзина територија.

Минатата недела словачката влада објави предлог за измена на Уставот со кој ќе се ограничат правата на ЛГБТ лицата. Овој предлог ја доведува во прашање надмоќта на европското право над националните закони.