Децата на улица под ризик да останат без својот дневен престој

До Министерството за социјална политика, демографија и млади, повторно е поднесено барање за добивање лиценца. Ирена Велкоска, координаторка на Дневниот центар, информираше дека чекаат комисија од Министерството за социјална политика, демографија и млади да дојде на увид за просторот и да констатира дали се исполнети услови во согласност со Правилникот за начинот, обемот, нормативите и стандардите за давање социјални услуги во дневен престој, а во меѓувреме продолжуваат со вршење на својата дејност, односно ги згрижуваат децата

Дневниот центар за деца на улица, во Шуто Оризари, повторно доставил барање за добивање лиценца до Министерството за социјална политика, демографија и млади, заедно со сета потребна документација за да не дојде до негово затворање. Како што информираше Ирена Велкоска, координаторка на Дневниот центар, во меѓувреме продолжуваат со вршење на својата дејност, односно ги згрижуваат децата кои се оставени сами на себе, на улицата.

– Сè уште немаме одговор од надлежното министерство. Чекаме комисијата да дојде на увид за просторот и да констатира дали се исполнети услови во согласност со Правилникот за начинот, обемот, нормативите и стандардите за давање социјални услуги во дневен престој – истакна Велкоска.

Дневниот центар годинава не доби финансиска поддршка од Министерството за социјална политика, демографија и млади и остана без дозвола за работа, односно лиценца за извршување на дејноста.

Од Дневниот центар претходно објаснија дека на 24.12.2024 година, Министерството за социјална политика, демографија и млади распишало јавен конкурс за доделување средства за социјални услуги, на кој бил пријавен и Дневниот центар, кој во предвидениот рок ја доставил пропишаната документација, освен уверението за платени даноци, кое го издава Управата за јавни приходи. Неговото издавање тие го побарале на 25.12.2024 година, во рамките на рокот за аплицирање, за што било известено и Министерството. УЈП им го издало уверението на 3.1.2025 година, кога и го приложиле до Министерството.

– Значи, од објективни причини (друг орган го издава уверението) бараниот документ е доставен на истиот ден на кој е издаден. На 29.1.2025 година, од страна на Комисијата за обезбедување средства за социјални услуги од општините и од други даватели, која функционира во рамките на Министерството, сме известени дека нашата пријава не е воопшто земена за разгледување, бидејќи недостига наведениот документ – објаснија од Дневниот центар.

Лиценцата на Дневниот центар му била одземена, како што објасни Велкоска поради тоа што, согласно со Правилникот за начинот, обемот, нормативите и стандардите за давање социјални услуги во дневен престој, просториите каде што се сместени не ги исполнувале условите за извршување на дејноста социјална, психолошка, педагошка и друг вид помош и заштита на децата од улица.

Образложението од Министерството за одбивањето да му дадат финансиска поддршка на овој Дневен центар беше дека Комисијата за обезбедување средства за социјални услуги од општините и од другите даватели констатирала оти не ги исполнува условите пропишани во конкурсот, за што бил навремено известен. Воедно, информираа и дека од Комисијата за лиценцирање даватели на социјални услуги при Министерството за социјална политика, демографија и млади е доставено мислење до Одделението за социјално вклучување, за неисполнетост на условите за вршење работа од социјалната заштита – за услугата центар за дневен престој за деца во ризик, при што таа воедно дала и мислење за одземање на дозволата за вршење работа во социјалната заштита за обезбедување на именуваната услуга, врз основа на што е изготвено соодветно решение, кое е доставено согласно со позитивните законски прописи.

Во моментов, во Центарот услуги добиваат 24 деца, кои се на возраст од 4 до 14 години. Согласно со предвидените план и програма за активности, приспособени на возраста, предзнаењето и интелектуалниот капацитет, децата се поделени во две групи. За нив се грижат социјален работник, психолог, воспитувач, негувател, координатор, а има вработено и хигиеничар.

Велкоска смета дека е загрижувачки фактот што со престанувањето со работа на Центарот, децата повторно ризикуваат да останат на улица, лишени од суштинската социјална, психолошка и педагошка поддршка.

– Центарот не само што работи директно со децата туку обезбедува и поддршка за нивните семејства, помагајќи им во стекнувањето работни вештини и социјална интеграција – потенцира таа.

(А.П.)