Во услови на високи надворешни температури, Агенцијата за храна и ветеринарство (АХВ) апелира да се води грижа и за домашните животни и милениците. Оттаму посочуваат дека намалено консумирање на храна, зголемена потреба за вода, намалено производство на млеко и слаб прираст, се дел од последиците врз здравјето на животните кои може да ги предизвикаат високите температури.
– Висок процент влага и недоволна вентилација во објектите може да биде причина за појава на топлотен удар, а сончаницата се појавува како последица на непосредно, директно изложување на животните на сонце, при што исходот може да биде фатален за животните доколку не се дејствува навреме. Напорната работа или транспортот на животните при високи температури, дополнително придонесува за влошување на нивната здравствена состојба – велат од АХВ.
Симптомите по кои може да се препознаат топлотниот удар и сончаницата кај животните, за што е неопходна итна реакција е забрзано и плитко дишење, несигурен од (тетеравење), суви слузници, зголемена телесна температура, забрзан пулс, исплашен поглед, зголемена жед, тикови и грчеви на мускулите кои се јавуваат при посериозните случаи.
– Во вакви услови животното треба да се смести во ладовина или во разладена просторија и полека да му се даде доволно количество свежа вода. Телесната температура треба да се намали со ставање на ладни облоги (покривање на главата и вратот со ладна и влажна крпа), туширање/прскање со умерено ладна вода, но треба да се внимава ладењето на животното да не биде премногу брзо – предупредуваат од Агенцијата.
Во одгледувалиштата да се обезбедат услови за сместување на животните.
– Животните треба да бидат заштитени од директната изложеност на сончевите зрачења, односно, во испустите потребно е да има натстрешници или природна сенка. На животните во одгледувалиштата треба во секое време да им е достапна свежа вода за пиење. Ако животните одат на паша или треба да се транспортираат, тоа треба да се врши во раните утрински или вечерните часови кога температурите се пониски. Сопствениците на домашни миленици треба да водат сметка милениците да не се оставаат во затворен автомобил, кој е директно изложен на сонце, и да се избегнуваат прошетки во текот на најтоплиот период од денот. На животните, доколку сте во можност и на бездомните, за кои нема кој да се грижи, во услови на високи надворешни температури, обезбедете им доволно количество и постојана достапност до свежа и чиста вода за пиење – стои во соопштението од Агенција за храна и ветеринарство.
