Цунода со високи амбиции влегува во првата трка

Јапонскиот возач во Формула 1, Јуки Цунода, ќе вози заедно со четирикратниот светски шампион Макс Верстапен, откако Ред Бул безмилосно ја прекина соработката со неубедливиот Новозеланѓанец Лијам Лосон минатата недела, по само две трки во новата сезона.

Цунода рече дека се чувствува „нереално“ да се вози за еден од врвните тимови на гридот и дека сака да остави силен впечаток пред домашните навивачи во Сузуки.

• Не сакам премногу да ги зголемувам очекувањата, но сакам да завршам на подиумот на ова Јапонско Гран При, рече 24-годишниот возач.

Цунода се пресели од јуниорскиот тим на Ред Бул, Рејсинг Булс (РБ), додека Лосон се врати во РБ, каде беше минатата сезона.

Јапонецот призна дека не очекувал да вози за главниот тим во Јапонија, откако Лосон беше доведен во тимот минатата година кога Мексиканецот Серхио Перез го напушти Ред Бул.

• Сè некако се собра и сега сум тука, благодарение на поддршката на сите што веруваа во мене, истакна Цунода.

Цунода никогаш не завршил на подиумот во четири полни сезони во Формула 1, но покажа добра брзина во двете трки оваа година. Тој беше дванаесетти на отворањето на сезоната во Мелбурн, а остана без бодови во Шангај поради лошата стратегија со две застанувања во боксот, за што беше одговорен РБ.

Цунода ги повика јапонските навивачи да го поддржат во Сузуки, каде што ќе дебитира во Ред Бул.

• Она што најмногу го очекувам е дека нема ситуација со поголем притисок и предизвик од ова. Тоа е и мое деби, па кога ќе го соберете сето тоа, мислам дека не чека неверојатно возбудлива трка, порача Цунода.

Лосон се бореше да го совлада болидот на Ред Бул, но Цунода рече дека „не изгледа толку тежок за возање“ по два дена на симулаторот.

• Сите велат дека болидот е многу чувствителен и јас го имав тој впечаток, но не ми изгледаше непредвидливо или комплицирано за возење, заврши Цунода.