Американската Централна разузнавачка агенција (ЦИА) понуди доброволни пакети за отпремнина на сите вработени со цел да ја преобликува својата работна сила во согласност со политиката на американскиот претседател Доналд Трамп, објави американскиот весник „Волстрит журнал“.
Портпаролот на ЦИА изјави дека мерките се дел од стратегијата на нејзиниот нов директор Џон Ретклиф, пренесе Ројтерс.
„Директорот Ретклиф брзо се движи за да се осигура дека работната сила на ЦИА е усогласена со приоритетите на националната администрација. „Овие мерки се дел од сеопфатната стратегија за внесување нова енергија во агенцијата“, се вели во соопштението на ЦИА, пренесе Танјуг.
Агенцијата не објави податоци за буџетот или бројот на вработени и не одговори на барањето за коментар.
Пакетот за отпремнини е дел од широката реформа на американската влада, спроведена од администрацијата на Трамп, која досега отпушти стотици државни службеници во обид да ја намали бирократијата и да ги постави лојалистите на клучни позиции, посочува Ројтерс.
Минатата недела Белата куќа понуди можност за земање платено отсуство до 30 септември за два милиони федерални вработени со полно работно време.
Во меѓувреме, синдикатите кои ги застапуваат државните службеници поднесоа тужба во обид да го блокираат планот.
Ретклиф, поранешен член на Претставничкиот дом и поранешен директор на националното разузнавање за време на првиот мандат на Трамп, беше потврден за директор на ЦИА од Сенатот само неколку дена откако Трамп го започна вториот мандат.
