Цената на гасот расте, европските залихи се топат

Како резултат на зголемената побарувачка поради ниските температури и укинувањето на ценовната граница на ниво на Европската унија, цените на гасот во Европа го достигнаа највисокото ниво за повеќе од една година. На холандската берза ТТФ, мегават-час гас со испорака вчера чинеше 53,9 евра, што е највисоко од крајот на октомври 2023 година.

Од минатата недела цените на гасот на берзата ТТФ се зголемија за околу 11%, од средината на септември за дури 50% и се речиси двојно поскапи од март минатата година, кога цената за мегаватчас беше 29,13 евра.

Растот на цената на гасот беше поттикнат од големата побарувачка поради ниските температури во Европа. Во такви услови, залихите на ниво на ЕУ на почетокот на февруари беа полни 53,11%, додека пропишаниот минимум е 60%.

Најниско ниво на залихи од 35,50% има во Франција, потоа 35,97 во Хрватска и 37,09% во Холандија.