Судијата Ивица Стефаносвки минатото рочиште час иполовина го диктираше исказот на Влатко Кешишев, а првообвинетиот Љупчо Палевски пишуваше бидејќи судот претходно го отсрани надвор од судницата на барање на Кешишев кој се плашеше да зборува во негово присуство. Палевски подготвил 97 прашања за човекот кој му слугувал во партијата Десна.
Обвинетиот Влатко Кешишев на денешното судење за двојното убиство на пензионерот од Велес Панче Жежовски и 14-годишната Вања Ѓорчевска од Скопје, вербално, но не и лице в лице, се соочи со првообвинетиот Љупчо Палевски. Кешишев седеше во првиот ред од големата судница и му беше завртен со грб на „царот“ кој пак откако обвинетите почнаа со давање исказ, седи од позади.
Прашањата, вкупно 97, му ги поставуваше со персирање, господине Кешишев му се обраќаше Палевски на својот компањон во чии одговори на моменти се чувствуваше немир. На речиси половина од поставените прашања, Кешишев одговараше со не знам. На минатото рочиште раскажа се што се случило, повторувајќи неколкупати дека не се правда и оти ја зборува вистината.
-Планот го правеше Палчо, призна обвинетиот кој послушно ги извршувал сите наредби од партискиот лидер. Готвел, пазарел за него и му го шетал кучето. Најголем дел од прашањата на Палевски му беа за синиот ранец во кој според Кешишев, ги чувале моторолите, а претпоставува и пиштолот со кој првообвинетиот ги ликвидирал жртвите.
– На минатото рочиште бевте прашан дали знаете каде се пиштолот и моторолите, а вие одговоривте во врска со син ранец, а не со пиштол. Па прашувам, зошто кога ќе ве прашаат за пиштол ве асоцира на синиот ранец? – праша Палевски.
– Претпоставувам дека во ранецот е пиштолот. Ако имаше пиштол до тебе, секако ќе се познаеше преку блузата – рече Кешишев.
Потоа Палевски го праша дали при претресот во штабот му биле одземени мачета од пола метар и пиштол плашливец копија од берета, но судијата не го дозволи прашањето бидејќи приговараше адвокатот на Кешишев, Игор Ефремов, па Палевски го преформулира прашањето. Влатко одговори: “Во кујната само погледнаа и не влегоа, бидејќи кучето Хера беше таму. Јас морав да ја држам за да не нападне некого. Беше претресена целата куќа од подрум до кров и немам видено дека имаат изнесено мачета и плашливец пиштол. Од мене го одзедоа телефонот и клучевите од штабот и од „доблото“, рече Кешишев.
– Дали некогаш се виделе пиштол од 9 милиметри, освен, како што кажавте, на настанот кај Оризови Дупки (местото каде што е убиена Вања)? – праша Палевски на што Кешишев одговори негативно.
Преку прашањата кои ги подготвил Палевски и одговорите на Кешишев се заклучи дека освен првообвинетиот, притисок во затворот му вршел и обвинетиот Велибор Манев поради што побарал преместување. Потоа Палевски се префрли на снимките од пред куќата на Велибор Манев, на кои се гледа како се подготвуваат пред да заминат кај Панче Жежовски. Палевски алудираше дека снимките се од времињата кога биле уаспени од полицијата додека на диво копале и барале злато во Демир Капија.
– Се сеќавате ли дека почна да се разденува кога пристигнавме кај Велибор во куќата сите четворица од Неготино, по што јас и вие заминавме во Скопје? – праша Палевски. – Да, се разденуваше, ние двајцата се вративме во штабот – рече Кешишев.– Дали времињата што се случија во Демир Капија и лицата одговараат на снимките?–праша Палевски, по што Кешишев потврди.
Претходно обвинетиот Кешишев беше испрашуван од адвокатот на Александар Ѓорчевски, Владимир Туфегџиќ и од бранителот на Боре Видевски, Бојан Манев. Кажа дека никогаш претходно не го слушнал Палевски да разговара со Ѓорчевски по телефон и оти секогаш кога Вељо ќе дошол во штабот се почнувал разговор за киднапирањето.
Од одговорите на Кешишев се заклучува дека Палевски бил опседнат со бришењето на трагите од работите со кој бил во допир за време на убиствата, со спреј ВД 40 го чистел воланот, менувачот, лопатите.
Она што се издвојува од сведочењето на обвинетиот Кешишев е неговото тврдење дека дупката за Вања била копана пред да биде застрелана и тоа дека Палевски претходниот ден набавил нови лопати и дурија, а на средбите за планирање на киднапирањата, никогаш не било споменато дека ќе се убива.
На следните судење треба да сведочи таткото на Вања, Александар Ѓорчевски, кој е обвинет за помагање во грабнувањето на неговата ќерка, преку давање на информацијата на обвинетите во кое време ќе излегува за на училиште. (П.А.)
