Царините на Трамп зближија демократка и републиканец: Предлагаат закон со кој значително ќе се ограничи моќта на американскиот претседател

Во Сенатот на американскиот Конгрес беше претставен закон со кој значително ќе се ограничи моќта на американскиот претседател да влијае на економската политика на оваа земја, а предлагачи се Марија Кантвел од Демократската партија и Чак Гресли од Републиканската партија.

Се разбира, тајмингот на оваа одлука сугерира дека во САД, во двете големи партии, постои јасен страв од последиците од одлуката на американскиот претседател Доналд Трамп да воведе царини за речиси секоја земја во светот.

Гресли и Кантвел се собраа за да воведат закон според кој американскиот претседател треба да дојде во Конгресот најмалку 60 дена пред воведувањето на царините и да објасни зошто се одлучил на тој потег.

Дополнително, американскиот претседател ќе треба да им претстави на членовите на двата дома на Конгресот анализа за тоа како овие царини ќе влијаат на потрошувачите и компаниите во САД.

После тоа, Конгресот ќе има 60 дена да гласа за овие царини, а доколку не ги одобри, американскиот претседател нема да има право да ги спроведе.

Овој закон наскоро ќе се најде во собраниска процедура на американскиот Конгрес, а особено е важно да се истакне дека предлогот е усвоен по царините на Трамп, кои според многу економски аналитичари можат да доведат до економски колапс во Америка, но и во остатокот од светот.

Трамп ги воведе царините користејќи ги „посебните права“ што ги има американскиот претседател, откако прогласи „криза“ и „вонредна состојба“ во економијата.