Црногорски државјанин копал во ѕидот на ќелијата во затворот во Бијело поле за да им овозможи на двајца руски државјани да избегаат од таа институција, неофицијално дознава „Вијести“.
Управата за извршување на кривични санкции на Црна Гора (УИКС) официјално соопшти дека го спречила планираното бегство на две приведени лица, по што случајот го предале во Центарот за безбедност во Бијело Поље.
Извор за „Вијести“ тврди дека властите во затворот поседувале информации за подготовките за бегството на таа група, но дека со акцијата чекале да ги фатат на дело.
„Државјанинот на Црна Гора бил изведувач, а планирано е и бегството на двајца руски државјани, кои со одлука на основниот суд се приведени“, вели изворот.
Од Службата за односи со јавноста на УИКС соопштија дека во понеделник извршиле планиран претрес во просторијата во која се чуваат петмина приведени.
Тие наведоа дека врз основа на претходни оперативни сознанија и следење на приведените, откриени и спречени се активности насочени кон ископување на надворешниот ѕид од просторијата.
„Врз основа на достапните податоци на УИКС, активностите на приведените биле насочени кон планирање и подготовка на бегството за потребите на двајцата приведени“, соопштија вчера од УИКС.
Во соопштението се истакнува дека поради недостиг на капацитет на Истражниот затвор Подгорица, во затворот Бијело Поље континуирано се сместени меѓу 100 и 120 притвореници, што ја усложнува безбедносната состојба и доведува до нови предизвици, ризици и закани.
