Екипата на Лос Анџелес Лејкерс во својот тим го донесе Брони Џејмс (19), најстариот син на нивниот најдобар играч Леброн Џејмс (39). Првиот стрелец во историјата на НБА го оствари сонот за кој сонуваше со години, да игра заедно со својот наследник во еден од НБА тимовите.
Агентот на Леброн, Рич Пол, наводно им се заканил на клубовите да не го избираат Брони и предупредил дека во тој случај следната сезона ќе ја игра во Австралија. Лејкерси дојдоа на ред и го избраа како 55. пик, кога на драфтот останаа само три места.
Треба да се нагласи дека овој потег на Лејкерси не гарантира дека таткото и синот следната сезона ќе играат за познатата франшиза од Лос Анџелес, ниту дека Брони ќе биде во тимот следната сезона, ниту дека Леброн ќе остане, бидејќи има опција да стане слободен агент следната недела. Сепак, сега секако е сосема можна ситуација која никогаш не се случила во историјата на НБА, татко и син да бидат заедно на теренот!
Иако бројот на играчи кои тргнале по патот на своите татковци и играле во НБА е трицифрен, никогаш не се случило да се сретнат истовремено во лигата и во ист тим. Следната сезона Џејмс сениор ќе го израмни рекордот на Винс Картер по бројот на одиграни сезони во НБА, кога ќе ја започне својата 22. натпреварувачка година во најсилната лига на светот.
Брони Џејмс игра на позицијата бек и со висина од 188 сантиметри ќе биде еден од најниските играчи во лигата. Минатата сезона ја мина на Универзитетот во Јужна Калифорнија и имаше просек од 4,8 поени, 2,8 скока и 2,1 асистенции, пред да ги загрижи сите кога колабираше на еден натпревар поради проблем со срцето. Затоа беше подложен на лекарски прегледи пред драфтот во НБА и беше утврдено дека нема никакви пречки да ја започне кариерата во најсилната лига на светот.
