Европската Унија ги одложи првите контрамерки против САД поради царините за метал, наметнати од претседателот Доналд Трамп, до средината на април, овозможувајќи преиспитување на тоа кои американски производи ќе бидат засегнати и обезбедува дополнителни недели за преговори.
Европската комисија предложи повторно воведување царини од 2018 година за американски производи во вредност од 4,5 милијарди евра (4,9 милијарди долари) на 1 април, проследено со дополнителни царини за дополнителни 18 милијарди евра на 13 април.
– Сега размислуваме да ја усогласиме временската рамка за двете групи контрамерки на ЕУ за да можеме истовремено да се консултираме со земјите членки на двете листи, што, исто така, ќе ни даде дополнително време за преговори со нашите американски партнери – објасни европскиот комесар за трговија, Марош Шефчовиќ, на сослушувањето во Европскиот парламент, во четвртокот.
Комисијата тогаш потврди дека сите контрамерки на ЕУ ќе стапат на сила на средината од април.
Првиот сет контрамерки вклучува воведување царина од 50 отсто за американскиот бурбон. Трамп, пак, се закани дека ќе воведе царина од 200 отсто за сите вина и други алкохолни производи од ЕУ доколку продолжат со оваа мерка.
Администрацијата на Трамп, исто така, планира да воведе „реципрочни“ тарифи на 2 април за да го ребалансира глобалниот трговски систем.
Шефчовиќ посочи дека досега постигнал ограничен напредок во преговорите со своите американски колеги, на пример во однос на својот предлог за намалување на увозните царини за индустриските производи.
Причината за ваквата одлука е да се добие повеќе време за консултации во блокот за усвојување нов пакет контрамерки за американскиот извоз до средината на април, но и да се даде дополнително време за преговори со САД. Целта на одложувањето е да се минимизира потенцијалното негативно влијание врз економијата, изјави шефицата на Европската комисија, Урсула фон дер Лајен.
