Бреговиќ и другарите во ритам на хитот  „Да се доживее стота“ – Легендарното „Бијело дугме“ со нов датум за концертот во Скопје

Македонскиот концертот на легендарниот бенд „Бијело дугме“, кој требаше да се одржи на 12 април во Арената „Борис Трајковски“ во Скопје одложен е за 31 мај. Сите купени влезници ќе важат за новиот датум, велат од организацијата на Продукцијата „Прагма“.

– Концертот го одложивме поради трагичниот настан во Кочани, велат организаторите, со што се согласни и членовите на групата која се уште има многу свои фанови низ Македонија.

Бреговиќ и другарите пред некој ден настапија и во Загреб пред преполната „Арена“. Големи медиумски разбранувања имаше во хрватските медиуми поради нивното пеење на контроверзната песна „Пљуни и запјевај моја Југославијо“.

Инаку, оваа песна ја поддржа и популарната Северина која присуствуваше на концертот во Загреб и која од сè срце, заедно со групата ја испеа спомената песна, која не е нешто омилена кај хрватската публика.

„Бијело дугме“ во Скопје ќе музицира во рамките на славеничката турнеја по повод 50 години од основањето. Турнејата е насловена според нивниот хит „Да се доживее стотата“, a лидерот на бендот Горан Бреговиќ најавува дека ќе свират 50 концерти во 50 градови од поранешната заедничка држава. На концертот во Скопје ќе бидат: Горан Бреговиќ, Ален Исламовиќ, Младен Војичиќ-Тифа, Ѓиѓи Јанкелиќ, Огњен Радивојевиќ и Зоран Реџиќ. Првиот пејач на бендот Жељко Бебек тврдоглаво одбил да настапува на славеничката турнеја, а со тоа и на концертот во Скопје.

Бебек и Бреговиќ се повеќе од десетина години во жестока караница, која резултираше и неколку пати со одење на суд, а се поради недефинирани авторски и изведувачки права. Исто така Бебек јавно се изјаснил дека на овие сегашни концерти на „Бијело дугме“ никогаш не би ја пеел песната „Пљуни и запјевај моја Југославија“, која секогаш му била многу одбивна.

(Д.М.)   фото: ФБ-архива