Претседателот на Бразил Луис Инасио Лула да Силва се опоравува на интензивна нега по итна операција на мозокот поврзана со неговиот пад во октомври, соопштија неговите лекари. Лула (79) е стабилна и нормално зборува и јаде по операцијата на мозокот која траела речиси два часа и била успешна, изјавиле лекарите на прес-конференцијата.
Тој се наоѓа во болницата Сирио Либанес. Лула имал крварење меѓу мозокот и менингеалната мембрана, објаснуваат лекарите, додавајќи дека нема повреда на мозокот или невролошки компликации.
Лула треба да остане на интензивна нега 48 часа и да се врати во главниот град Бразилија на почетокот на следната недела „ако се биде добро“, најави лекарот Роберто Калил Фиљо.
Лула избегнуваше да патува во последните месеци додека лекарите го следеа неговото закрепнување по падот во неговиот дом кон крајот на октомври. Притоа, тој удрил во задниот дел од главата и морал да биде сошиен.
Но, за време на состанокот со конгресните лидери во понеделникот вечерта во Бразилија, тој се пожали на влошена главоболка и беше однесен во болница на тестови, потврди неговиот портпарол Пауло Пимента во интервју за радио. Скенирањето со магнетна резонанца покажало дека има крварење во черепот, па брзо бил пренесен со хеликоптер на операција во Сао Паоло, објави владата.
Потпретседателот Гералдо Алкмин ги откажа плановите во Сао Паоло и се врати во Бразилија за да ги преземе должностите на Лула, вклучително и посетата на словачкиот премиер Роберто Фика.
