Болно приземјување и ништо од пеколот за Албанците!

Можеби клучниот натпревар од мундијалските квалификации, барем за второто место во квалификациската група К, ќе биде оној меѓу Србија и Албанија, што ќе се одигра во октомври.

Англичаните се апсолутни фаворити за првото место, додека патникот во баражот ќе се бара меѓу Албанија и Србија, а натпреварите на тие две селекции однапред се окарактеризирани како дуели од висок ризик.

Првиот дуел меѓу овие две селекции ќе се одигра во јуни, кога националниот стадион во Тирана ќе биде домаќин на репрезентацијата на Србија.

Веќе е познато дека поради казната на УЕФА нема да продаваат билети на гостинските навивачи, па „орлите“ ќе бидат без поддршка.

Вториот меч е закажан за во октомври, но не е одреден стадионот на кој Србија ќе го пречека лутиот ривал. Како што сега стојат работите, тоа нема да биде Белград.

Имено, познатиот албански новинар Арлинд Садику откри дека натпреварот нема да се игра во Белград, туку дека најверојатно тоа ќе биде стадионот „Караѓорѓе“ во Нови Сад.

„Натпреварот Србија – Албанија нема да се игра во Белград, во моментов опција е Нови Сад. Не се очекува присуство на албански навивачи од безбедносни причини. Нема да има српски навивачи во Тирана затоа што се казнети“, е веста која ексклузивно ја пренесе познат новинар.

Доколку мечот се игра во Нови Сад, прашање е дали ќе може да се создаде пеколна атмосфера како на пример на „Хумска“ или на стадионот „Рајко Митиќ“.

Пред 11 години кога овие две екипи играа во Хумска, трибините беа преполни, а се заврши со сега познатите нереди.

И тогаш на трибините немаше албански навивачи, но со слетување на дрон со знамето на Велика Албанија тие направија голема провокација, што беше причина за општ хаос.

Сигурно никому не е во интерес повторно да ги гледа истите сцени, па УЕФА ќе издаде дополнителни инструкции за подобрување на безбедноста за сите учесници на натпреварот.

„Орлите“ станаа тотално непривлечни за навивачите, публиката им го сврте грбот, па можеби затоа бараат стадион на кој трибините би можеле да се наполнат до крај.

Капацитетот на стадионот Караѓорѓе е околу 15.000 и нема сомнеж дека за натпреварот со Албанците би се барале повеќе билети поради значењето на натпреварот.