Граѓаните на Загреб и северните делови на Хрватска синоќа имаа можност да видат несекојдневна појава на ноќното небо – синкава светлина која со голема брзина им прелета над главите.
Оваа појава предизвика бројни реакции на социјалните мрежи, а набрзо се појавија и првите претпоставки за тоа што би можело да биде причина за овој необичен феномен.
Иако се уште нема официјална потврда од надлежните институции, некои експерти и љубители на астрономијата претпоставуваат дека се работи за болид – многу светол метеор кој изгледа како огнена топка и остава впечатлива светлосна трага додека минува низ атмосферата.
Со оглед на брзината и интензитетот на светлината, сведоците наведуваат дека сцената била исклучително впечатлива и краткотрајна, што дополнително ја разгорело љубопитноста и ширењето на различни теории. Се очекува астрономите да дадат повеќе информации за овој небесен феномен во наредните денови, пренесува Index.hr.
