Биткоинот „експлодираше“, експертите за инвестициите во нив: „Ризично е!“

Биткоинот достигна највисоко ниво на сите времиња, а за тоа заслужен е подемот на Трамп, кој забрза сè. Значително зголемување на вредноста на оваа дигитална валута се случи во пресрет на претседателските избори во САД.

Биткоинот скокна во изборната ноќ, кога стана јасно дека Доналд Трамп победува, и продолжи да расте по неговата победа.

Цената на биткоинот сега е околу 89.100 долари, што е благ пад од највисоко ниво од 93.477 долари во средата. Оваа година оваа најпозната криптовалута забележа пораст од 80 отсто. Аналитичарите сметаат дека победата на Трамп е позитивна околност за биткоинот и другите дигитални валути.

Иако Трамп во минатото беше скептичен за биткоинот, нарекувајќи го нешто „засновано на воздух“, тој се предомисли во последните месеци. Таа промена беше делумно поттикната од неговите финансиски интереси во индустријата. Тој и неговите деца започнаа крипто-бизнис наречен World Liberty Financial во септември.

Тој вети дека ќе ги направи САД крипто-престолнина на планетата и ќе создаде стратешка резерва на биткоини. Неговата кампања прифати донации во криптовалути.

Но, историјата покажува дека можете да изгубите пари на криптовалути, исто толку брзо колку што можете да заработите пари. На почетокот на пандемијата на коронавирус, биткоинот вредеше нешто повеќе од 8.000 долари.

Во ноември 2021 година цената беше 69.000 долари, а на почетокот на минатата година еден биткоин можеше да се купи за помалку од 17.000 долари.

Меѓутоа, инвеститорите почнаа да се враќаат во голем број додека инфлацијата почна да се намалува – а добивките вртоглаво пораснаа со враќањето на Трамп.

Никола Шкориќ, ко-основач и директор на Electrocoin, за Index.hr вели дека порастот на цената на биткоинот и другите криптовалути поради победата на Трамп може да се толкува како реакција на пазарот на ветувањата на Трамп за поволна регулација и поттикнување на развојот на крипто индустријата.

„Засега тоа се уште се само ветувања, а без јасен план е тешко да се каже колку е одржлив таквиот раст во моментов. Глобалната економска состојба во последните години се карактеризира со неизвесност и инфлација, што секако дополнително ги поттикнува инвеститорите на алтернативни инвестиции како што е биткоинот“, вели Шкориќ.

Цената на биткоинот зависи и од геополитичките околности, а што се однесува до инвестициите во нив, тие се многу ризични, посочува ИТ експертот Луцијан Цариќ за Индекс,хр.

„Познато е дека секоја инвестиција е ризична и дека е разумно да се инвестираат само слободни средства чија загуба можете да ја поднесете“, вели Цариќ.