Барса и ПСЖ ги заверуваат полуфиналните билети

Буквално треба да се случи вистинско чудо за да денеска фудбалерите на каталонскиот гигант Барселона не го прослават пласманот во полуфиналната рунда од Лигата на шампиони. Избраниците на Ханси Флик одиграа совршено во првиот 1/4 финален дуел и сосема заслужено со убедливи 4:0 го прегазија германскиот бундеслигаш Борсуија од Дортмунд.

Тешко е за верување дека домаќинот може да ја анулира негативата од четири гола, но предводникот на Барса, Ханси Флик, испрати јасна порака до своите фудбалери дека се уште не е осигуран пласманот во полуфиналето.

-Се уште не сме во полуфинале. Ни беше важно да победиме со голема разлика. Кога екипата игра добро, нормално е да постигнеме многу голови. Не сакам да мислам дека сме во полуфиналето, бидејќи во фудбалот никогаш не можеш да знаеш што ќе се случи. Ова е луд спорт. Важно е и на реваншот да излеземе на терен со таква желба. Борусија е добар тим и ние тоа го знаеме, изјави германскиот стручњак.

Многу блиску до зацртаната цел е и францускиот преставник ПСЖ кој реванш дуелот во Бирмингем против англискиот премиерлигаш Астон Вила, ќе го стартува со предност од два гола. Популарните „светци“ беа подобар противник на „Паркот на принцовте“ и тешко е за верување дека избраниците на Луис Енрике ќе ја прокоцкаат добиената шасна да играат во полуфиналето од ЛШ.

– Ако ме прашувате мене, повторно сме во иста ситуација и ништо не е сменето. Едноставно, мораме да го победиме ПСЖ, истото го кажав и пред првиот меч во Париз. Ја освоија титулата во Франција и се максимално фокусирани на Лигата на шампионите, но тоа не мора ништо да значи за нас. Во реваншот мораме да бидеме подобри. Ќе играме пред нашите навивачи кои ќе дојдат да проследат уште еден наш подвиг. Се надевам дека ќе се радуваме на крајот, изјави менаџерот на Астон Вила и поранешен тренер на ПСЖ, Унаи Емери.