Бараме минимална плата од 500 евра и за пратениците!

Тие побараа од Владата повлекување на одлуката за зголемување на минималната плата за 1.800 денари и намалување на платите на избраните и именуваните лица на ниво на минимална плата. – Тука сме да ви ја упатиме последната порака: не може да се одлучува за нас без нас. ССМ, пред две години, организираше генерален штрајк во целиот јавен сектор. На чекор сме до генерален штрајк во целата држава.

Министерот за економија и труд, Бесар Дурмиши, пред одржувањето на јавната седница на ССМ, потсети дека висината на минималната плата е легитимна и утврдена согласно со критериумите во Законот за минимална плата и ако не се донела до 31 март, ќе се блокирала исплатата на платите во целата држава

Со едноминутен молк во чест на жртвите од трагедијата во Кочани, вчера напладне голем број членови на највисокото раководство на Сојузот на синдикатите на Македонија (ССМ), придружувани од 300 члена од највисокото раководство на Сојузот на синдикатите на Македонија и синдикатите здружени во ССМ и од други работници, на улица ја одржаа првата јавна седница.

– Оваа јавна седница ја одржуваме во исклучително тажни околности. Со едноминутно молчење, да им оддадеме почит на трагично загинатите во Кочани. Вечна им слава, а на повредените им посакуваме брзо закрепнување – изјави претседателот на Сојузот на синдикатите на Македонија, Слободан Трендафилов.

Тие побараа од Владата повлекување на одлуката за зголемување на минималната плата за 1.800 денари и намалување на платите на избраните и именуваните лица на ниво на минимална плата.

– Тука сме да ви ја упатиме последната порака: не може да се одлучува за нас без нас. ССМ, пред две години, организираше генерален штрајк во целиот јавен сектор. На чекор сме до генерален штрајк во целата држава. Бараме од вас да бидете луѓе онака како што сме ве избрале. Да не се однесувате кон работникот како кон луѓе од трета категорија и да бидете на ниво на задачата – рече Трендафилов и ја повика Владата, како најголем работодавец, да ги почитува колективните договори и да се зголемат платите во јавниот сектор.

Раководството на ССМ, пред Собранието, побара од пратениците да изгласаат одлука за зголемување на минималната плата на 500 евра и да ги намалат своите плати на ниво на минималната плата. Првиот синдикалец дури и предложи, заедно со премиерот Христијан Мицкоски, да земаат минимална плата од 500 евра, а да се зголемат другите плати за 100 евра.

– Не сме тука да ја рушиме Владата, туку да ги зголемиме платите. Ќе организираме генерален штрајк ако не се зголеми минималната плата, а ако не пораснат платите на работниците, ќе има протест – се закани Трендафилов.

Претседателот на Синдикатот на УПОЗ, Трпе Деаноски, рече дека Владата решила 129 илјади вработени во јавниот сектор што зависат од минимална плата да ги остави да ги изедат газдите од приватниот сектор. Од ССМ ги повикаа работодавците да ги зголемат платите на работниците за да не бидат виновни за иселувањето на работничката сила.

Министерот за економија и труд, Бесар Дурмиши, пред одржувањето на јавната седница на ССМ, потсети дека висината на минималната плата е легитимна и утврдена согласно со критериумите во Законот за минимална плата и ако не била донесена до 31 март, ќе се блокирала исплатата на платите во целата држава. Тој истакна дека ако се договорат синдикатите и работодавците за која било друга методологија и законско решение за утврдување на минималната плата, тука се да им помогнат и да им излезат во пресрет.

– Согласност од Економско-социјалниот совет нема, поради тоа што нема репрезентативност од синдикатите. Но, според Законот што е на сила, и е потпишан и од синдикатите и од работодавците, обврзан сум и по одлука на Владата пред 31 март да ја објавам минималната плата. Од минималната плата потоа се пресметуваат и просечната и другите плати. Ако не ја објавевме до 31 март, ќе се блокираа целата држава и сите институции, а приватниот сектор не ќе можеше да ги пресмета платите за своите вработени – рече Дурмиши, кој за протестот на Синдикатот рече дека „живееме во демократија и секој има право да излезе на улица и да го каже својот револт“.

Од Владата вчера брзопотезно упатија апел до синдикатот да не ја злоупотребува ситуацијата во државата и да не се обидува да ја извитопери дебатата со состојбата на работниците.

– Со обиди за компарации на плати и популистички изливи на агресија само се докажува партиската позадина на дел од раководството на синдикатот. Кога прават компарација на плати, да ги потсетиме дека ние како влада бевме против кога платите на функционерите се зголемуваа, а синдикатот тогаш молчеше за своите партиски миленици од СДСМ и ДУИ. Како што молчеа со години додека СДСМ беше на власт, а државата ја уништуваа, ограбуваа и продаваа. Но тоа е зад нас – истакнаа од Владата.

Оттаму сметаат дека нивото на дискусија да се спуштат сите плати не претставува проблем, но дека тоа на работниците нема да им го реши проблемот.

– Ова е прва влада која донесе одлука за замрзнување на платите на функционерите. Истовремено, за премиер да има иста плата со претседател на синдикат, треба претседателот на синдикатот да победи на избори на првите наредни парламентарни избори, а пред тоа да има договор да се најде на листите на СДСМ. Тогаш, ако го изгласа народот, ќе видиме дали така лесно ќе се откажува од платата. Штом е така подготвен коцкарски да се откаже од својата плата, лошо зборува за него и за блеферската природа на неговата личност. Впрочем, само човек што има многу пари со леснотија може да се откаже од пола плата. Апелираме затоа да внимава, затоа што прави очигледна Фројдова грешка со која покажува дека за него парите не се проблем, зашто преку ноќ, во излив на блеф и партиски мотив, кажува дека е подготвен да се откаже од своите примања – нагласија од Влада.

(С. Бл.)