Претседателот на Стопанската комора, Бранко Азески денеска во Софија се сретнал со бугарскиот претседател, Румен Радев. Како што информираа од Стопанската комора на Македонија, Азески и Радев заедно се договориле да организираат средби на македонски и на бугарски бизнисмени во текот на месецов, исклучиво на теми поврзани со инфраструктурата, зголемување на трговската размена и отстранување на сите бариери кои ја попречуваат соработката меѓу двете земји.
-За таа цел претседателот Азески ќе одржи одделни средби со премиерот Желјазков и со вицепремиерот и министер за транспорт на Р. Бугарија, Гроздан Караџов, стои во сооптението од Стопанската комора на Македонија.
Денес во Софија се одржува „The Economist Business Summit“, кој ги собра заедно политичките и бизнис лидерите од Бугарија и од регионот. Се разговараше на глобални и регионални теми како: глобалната геополитичка состојба, енергијата и зелената транзиција, вештачката интелигенција, информатичката технологија и приоритетите на Р. Бугарија за 2025 година.
На настанот се обратија претседателот на Р. Бугарија, Румен Радев, кој официјално го отвори Самитот, како и премиерот Росен Желјазков.
