Започна со работа фабриката „Магна мехатроникс“

Започна со работа фабриката „Магна Мехатроникс“, инвестиција околу 40 милиони евра и вработувања на 600 лица.

– Оваа инвестиција не е само капитален проект, туку вистинска приказна за доверба, партнерство и заедничка визија. Се простира на 18.000 квадратни метри, за што ќе бидат инвестирани околу 40 милиони евра и од презентацијата на претходните говорници можеме да заклучиме дека ќе бидат вработени во самиот пик на инвестицијата повеќе од 600 лица. Благодарение на оваа фабрика, се отвораат нови работни места, се зголемува индустриското производство и се зајакнува економијата – истакна премиерот Христијан Мицкоски.

Тој објави дека пет странски компании покажале интерес да инвестираат и да подигнат фабрики во Технолошко-индустриската развојна зона (ТИРЗ) Штип.

– Има неколку компании коишто се заинтересирани да инвестираат овде во Штип, односно во овој ТИРЗ. Јас очекувам ако не сите, најголем дел од нив да донесат одлука уште оваа година, со што драматично ќе се подобри стандардот на штипјани, но и на сите оние коишто гравитираат околу Штип – рече Мицкоски.

Премиерот ја изрази подготвеноста на државата да биде дом на успешни и конкурентни компании, кои не само што произведуваат, туку и создаваат вредности што ќе се чувствуваат низ генерациите.

– Како Влада, остануваме посветени на создавање поволна деловна клима, транспарентни услови за инвестиции и поддршка за секој стопанственик кој има визија да вложува и да расте овде. Работиме напорно на подобрување на инфраструктурата, реформи во образованието и создавање квалификувана работна сила што ќе ги задоволи потребите на модерната индустрија – рече Мицкоски.

Тој потсети дека зад нас се два успешни економски квартали (третиот и четвртиот) од 2024 година.

– За првпат после подолго време во третиот квартал забележавме раст на бруто-домашниот производ од 3%, а во четвртиот квартал дури отидовме и чекор повеќе 3,2% со што се вбројуваме во тие квартали во сме пет најбрзорастечки економии во Европа. Очекувам тој тренд да продолжи и во овој прв квартал од оваа година. Од она што можеме да заклучиме, расте просечната плата, имаме и зголемување на пензиите. Правиме сè од една руинирана состојба како што ја затекнавме да направиме економија којашто ќе биде конкурентна со европските и светските економии – рече премиерот Мицкоски.

„Магна“ е водечки снабдувач на целосни системи на иновативни мехатронички системи за глобалната автомобилска индустрија.