АНРИ: „Тој е комплетен играч, сигурно е пред останатите во моментов“

И покрај тоа што сезоната се уште е во полн ек, во јавноста веќе почна да се зборува за тоа кој би можел да ја освои „Златната топка“ на крајот од сезоната, а неколку фудбалери секако се истакнаа со своите настапи во претходниот дел од сезоната.

Пред се, ова се однесува на фудбалерите од Барселона, Реал (М) и Ливерпул. Секако, тоа се Рафиња, Педри, Винисиус Јуниор, Килијан Мбапе и Мохамед Салах.

„Златната топка“ беше тема и во студиото на „CBS“ каде традиционално беа Тјери Анри, Џејми Карагер и Мика Ричардс, кои дискутираа по завршувањето на натпреварот помеѓу Барселона и Бенфика.

Каталонците успеаја да се пласираат во четвртфиналето од Лигата на шампионите бидејќи во реваншот ја победија Бенфика со 3:1, а Рафиња одигра одличен натпревар постигнувајќи два гола.

Бразилецот постигна три од четирите гола за Барселона против Бенфика во двомеч и докажа дека е во врвна форма оваа сезона. Тој во досегашниот дел од сезоната има постигнато 11 гола во ЛШ и е најдобар стрелец во ова натпреварување.

Токму него Анри го издвои како главен фаворит за освојување на „Златната топка“ бидејќи смета дека Рафиња покажал најмногу.

„Рафиња секако е меѓу тие фаворити. За мене тој е пред сите во оваа битка во моментов. 11 гола во ЛШ, Мохамед Салах е таму како и Хари Кејн, но Рафиња постигна толку многу голови и само еден од нив беше од белата точка“, изјави Анри и додаде:

„Не сакам да кажам дека пеналите се помалку важни затоа што Салах има нереална сезона, но тоа го велам од гледна точка дека ако некој играч постигне голови колку и другите без пенали, тогаш треба повеќе да зборуваме за него. Она што Рафиња го прави покрај тоа што му помага на тимот е одлично“.

„Луѓето често велат дека играчите мора да бидат комплетни. Напаѓачите исто така мора да притискаат, да бидат дел од одбраната и да им помагаат на дефанзивците… Има многу работи што треба да ги направите за да бидете комплетни освен да постигнувате голови, а Рафиња го прави сето тоа оваа сезона“.

Треба да се напомене дека Рафиња е првиот Бразилец во историјата кој постигнал најмалку 11 голови во една сезона во ЛШ. Досега во дресот на Барселона одигра 41 натпревар во сите натпреварувања и постигна 27 голови и додаде 19 асистенции.