„Анима Мунди“ се оградува од било какви вербални напади или инциденти по завршувањето на протестот за кучето Феликс

Здружението за заштита на животните „Анима Мунди“ се оградува од било какви вербални напади или инциденти кои се случиле по завршувањето на протестот по повод првото рочиште за случајот со Феликс, предизвикани од поединци кои учествуваа во истиот.

-Нашето здружение го иницираше овој собир и повика на поддршка единствено со цел да се постигне една основна цел – правда за животните и строго казнување на насилството врз нив. Во согласност со оваа цел, категорично се противиме на каква било форма на насилство и никогаш нема да охрабриме, поддржиме или учествуваме во дејства кои го нарушуваат правниот поредок. Бараме и се бориме за правна држава и правосуден систем, кои треба да обезбедат правда за сите. Затоа и бевме дел од протестот – за да се бараат правни мерки за санкционирање на сторителите – реагираа од „Анима Мунди“.

Оттаму додаваат дека имаат целосно разбирање за емоциите и болката на сите оние кои го познаваа кучето Феликс, како и на сите оние кои доживеале слични трагедии.

При тоа, апелираа до сите активисти, здруженија и поединци на трезвеност и фокус и да не го земаат законот во свои раце, а наместо тоа, енергијата да се насочи кон превенција на ваквите случаи на мачење и убивање животни и обезбедување соодветни санкции за сторителите преку правниот систем.

-Очекуваме дека ќе биде изречена најстрога казна, со што ќе се пратат јасни пораки дека секој кој го прекршува законот ќе биде казнет, а институциите ќе ја обезбедат правдата, без потреба од граѓаните да ја земаат во свои раце – велат од „Анима Мунди“.