Американските власти веруваат дека режимот на Асад може да падне за неколку дена

Официјални лица од администрацијата на американскиот претседател Џозеф Бајден, набљудувајќи ја извонредната брзина на напредувањето на сириските бунтовници, сè повеќе гледаат можност за пад на режимот на Башар ал Асад за неколку дена, изјавија за Си-Ен-Ен (CNN) пет американски претставници.

Ако американската анализа се покаже како вистинита, тоа би претставувало спектакуларно брзо паѓање од власт за сирискиот претседател по 14 години војна, која беше релативно стагнантна до минатата недела, наведува Си-Ен-Ен.

Официјалните лица предупредија дека не се појавила формална проценка за судбината на Асад и дека ставовите се различни.

Висок американски функционер рече дека режимот на Асад најверојатно ќе изгуби каков било изглед на моќ до следниот викенд.

„Единственото нешто што би го одложило освојувањето на бунтовниците би било добро организиран пуч и реорганизација, но луѓето на Асад направија добра работа да ги задушат сите потенцијални конкуренти“, додаде функционерот.

Значајна загриженост на администрацијата е безбедноста на залихите на хемиско оружје на Асад, за кои се верува дека вклучуваат хлор и сарин, рече Си-Ен-Ен.

Засега не е познато каде Асад би можел да побегне, изјавија американските власти.

Неговите „покровители“ би можеле да понудат засолниште во Москва или Техеран, а останува да се види дали бунтовниците ќе ги насочат своите напади врз Латакија, енклава на алавитската секта на која и припаѓа Асад, наведува Си-Ен-Ен.

Кабинетот на шефот на сириската држава денеска соопшти дека „информациите дека Асад наводно го напуштил Дамаск е неточна и има за цел да ја доведе во заблуда сириската јавност“.

„Претседателот продолжува да работи во Дамаск и да ги извршува своите задачи за заштита на националните интереси и Уставот. Сите вести поврзани со активностите на претседателот се испраќаат до соодветните платформи на Канцеларијата на претседателот и на националните медиуми“, Кабинетот на Асад се вели во соопштението.

Безбедносната ситуација во Сирија се влоши бидејќи сириските бунтовнички групи, предводени од организацијата Хајат Тахрир ал Шам, влегоа во два града во централна Сирија, Растан и Талбисех и се приближија до третиот по големина сириски град Хомс.

Претходно ги окупираа градовите Хама и Алепо на север, а според последните информации стигнаа до предградијата на главниот град на Сирија, Дамаск, пренесува Танјуг.