Американските понуди за мир без ефект: Русија го отфрла мировниот договор, Украина договорот за минералите

546

Русија вчера соопшти дека сериозно ги разгледува американските предлози за прекин на огнот во Украина, но дека „не може да го прифати“ сегашниот мировен договор на американскиот Трамп и постави нов сет на барања. Украинскиот претседател Володимир Зеленски изјави дека нема да се согласат на никаков договор со Американците за експлоатација на нејзините природни ресурси, доколку тоа ги загрози амбициите на Украина за членство во Европската Унија.

 

Војната во Украина не заврши за 24 часа, како што рече американскиот претседател Доналд Трамп, кога се кандидираше за функцијата, а многу веројатно нема да заврши ни до Велигден, како што прогнозираа голем број аналитичари.

Колку што се интензивираат преговорите на американските претставници со завојуваните страни, толку воените дејства стануваат пожестоки, а жртвите побројни. Русија вчера соопшти дека сериозно ги разгледува американските предлози за прекин на огнот во Украина, но дека „не може да го прифати“ сегашниот мировен договор на американскиот Трамп и постави нов сет на барања. Во интервју за неделникот „Интернешнл аферс“ заменик-министерот за надворешни работи на Русија, Сергеј Рјабков Кремљ, изјави дека сака САД да го земат предвид она што Русите го гледаат како основни причини за конфликтот. Како што е познато, Русија се држи до барањето да ја задржи контролата на четирите украински области, кои ги анектираше во 2022 година и Украина никогаш да не стане членка на НАТО. За Украина исполнувањето на овие услови е еднакво на капитулација.

Трамп, пак, викендов кажа дека му е лут на Путин и се закани дека ќе им воведе санкции на државите кои ја купуваат руската нафта ако Москва го блокира договорот за примирје. Сигнали за заладување на едвај подобрените односи со САД  доаѓаат и од Украина. Украинскиот претседател Володимир Зеленски изјави дека нема да се согласат на никаков договор со Американците за експлоатација на нејзините природни ресурси, доколку тоа ги загрози амбициите на Украина за членство во Европската унија. Според украинскиот портал „Јуропиан Џастис“, предложениот нацрт договор за вредните украински ресурси би можел да биде во спротивност со критериумите за економски суверенитет што Украина мора да ги исполни за пристапување во ЕУ.

Но, напорите за постигнување мир продолжуваат. Кирил Дмитриев, близок соработник на Путин, кој е клучниот преговарач во име на Москва оваа недела  треба да отпатува за Вашингтон на средба со Стив Виткоф, пратеник на Трамп, кој учествуваше во преговорите за Украина во Ријад. Целта на нивната средба ќе биде зајакнување на односите меѓу САД и Русија и барање решение за ставање крај на војната во Украина, потврдиле за „Аксиос“ двајца американски службеници.

Континуирана поддршка на НАТО треба да биде една од темите на кои  ќе разменуваат мислења министрите за одбрана на 32-те членки на НАТО на денешниот состанок. Според претставник на Алијансата, се очекува тие да разговараат и за тоа како да се одржи моментумот во зголемувањето на трошоците за одбрана и начините за обнова на индустриското производство во одбранбениот сектор, како и за начините за понатамошно развивање на соработката на сојузниците со партнерите од индопацифичкиот регион, вклучувајќи ги Австралија, Јапонија, Нов Зеланд и Јужна Кореја.

 

ИЗДВОЕНИ