На Отвореното првенство на Македонија во шах, кое започна викендов, се одигра четвртото коло, a во него, како и во претходните, имаше помали изненадувања, со што на табелата се издвоија петмина играчи меѓу првите 10 носители како фаворити за конечен триумф.
Во согласност со правилата за парување според швајцарскиот систем, тие сега започнуваат со меѓусебни дуели и низ директни пресметки ќе го дадат конечниот изглед на табелата.
Она што е интересно да се одбележи е тоа што речиси во секое коло имаше по некој сензационален резултат. Така, во првото коло младинецот на ШК Алкалоид, Матеј Бојковски (1697), успеа да го изненади шестиот носител Антон Златков (2257) со ретко играна варијанта на сицилијанска одбрана, при што успешно ги искористи непрецизностите во играта на противникот, ја препозна шансата што му се укажа и со одлична техника ја финишираше партијата, правејќи матна мрежа. Бојковски продолжи со одличната игра и во второто коло, каде што ремизираше со ФМ Љубомир Илиќ (2051).
Меѓу изненадувачките резултати од второто коло треба да се издвојат блесоците на ветераните Атанас Ташевски (1955) и Лазо Спасовски (1770), кои во вчерашното четврто коло стигнаа да играат на првата, односно на третата табла. ИМ Емил Ристески (2365), со победата над Спасовски, стигна до максимални 4 бода, додека, пак, ИМ Тони Лазов (2358), по трите победи во низа во четвртото коло, ремизираше со ФМ Андреј Велјаноски (2290) и е веднаш зад него со 3,5 бода.
Шампионот од 2021 година, Филип Михов (2225), исто така, има само половина поен помалку од лидерот, откако во третото коло ремизираше со вториот носител, ИМ Никола Николовски (2381), а вчера го совлада Дејан Јанков (2165).
Во женска конкуренција се игра посебен турнир со учество на 10 шахистки, кои играат според Бергеровиот систем (секоја против секоја). Паровите беа одредени со ждрепка за стартните броеви, па така дел од фаворитките за висок пласман се сретнаа уште во првите рунди.
Во првото коло, Жежовска (1868) го доби мечот со Николовска (1905), додека, пак, во второто коло ремизираше со ЖИМ Габриела Коскоска (1993). Во третото коло, Леа Ефтовска (1797) ја совлада Жежовска, па на тој начин внесе неизвесност во борбата за првите позиции. Откако по три кола водеше Инџи Ајрадиновска (1809), Леа Ефтовска во четвртото коло ја совлада во директен дуел и го презеде врвот со 3,5 бода. Сепак, идентичен скор има и ЖИМ Габриела Коскоска, која во четвртото коло имаше лесна победа над младата Смилевска, па така двете дами од ШК Алкалоид се на водечките позиции.
На двата турнира се предвидени по 9 кола, односно со партиите од петтото коло, кои се играа во вторникот, турнирите влегуваат во втората половина. До крајот ќе се игра по една партија на ден, со почеток во 17:30 часот, а прогласувањето на новите шампиони ќе биде на 18 мај.
