Како и повеќето репрезентации од Балканот, и Албанија има неколку организирани навивачки групи, а најбројната и долгогодишната реши да го крене гласот.
Имено, Албанската фудбалска федерација одлучи да и забрани на групата Tifozat Kuq e Zi (црвено-црни навивачи) да купува билети за денешниот натпревар против Англија на „Вембли“.
Оваа навивачка група жестоко го критикуваше Фудбалскиот сојуз на Албанија дека се согласил на заедничка организација со Србија на ЕП за играчи до 21 година, па најавија одмазда.
Поради оваа причина, ултрасите сметаат дека АФФ им ја ускратила продажбата на билети со цел да се спречат можни нереди на трибините, поради што имало жестока реакција.
„Како никогаш досега од постоењето на групата ние останавме без билети за репрезентативните натпревари. Во овие 21 година ТКЗ честопати беше единствената која стоеше на трибините на стадионот, кога немаше услови, кога немаше резултати, каде немаше стадион, каде што немаше навивачи, затоа што во тоа време навивањето за репрезентацијата се сметаше за глупаво.
Ако фудбалскиот тим имаше причина да не се чувствува инфериорно дури и кога поразот беше неизбежен, тоа беше затоа што црвено-црните навивачи беа секогаш таму. Се менуваа тренерите, играчите и стадионите, а единствени кои постојано беа со репрезентацијата беа црвено-црните навивачи.
Сега, во 2025 година, кога двапати се пласиравме на ЕП и кога репрезентацијата почна да бележи резултати и со тоа да ја зголеми побарувачката за билети, бевме казнети од Албанската федерација.
Од челниците на АФФ по електронска пошта бевме известени дека нема да има однапред резервирани билети, како што беше случај во изминатите 21 година, со образложение дека сакаат да им дадат шанса и на другите навивачи.
Ваквото објаснување, освен што е неважечко, не е ни праведно, згора на тоа е типична одмазда на АФФ поради нашите забелешки дека со Србија организираме заедничко првенство, а познато е дека играме со Србија во квалификациите за СП.
Никој не може да престане да доаѓа на стадион и да ја бодри албанската репрезентација, па дури ни АФФ . Ќе бидеме таму, ќе бидеме на Вембли, ќе бидеме насекаде да го дадеме своето мислење, да го изразиме своето незадоволство.
Нашите реакции нема да престанат, само ќе се интензивираат“, остро порачаа албанските ултраси.
Инаку, на натпреварите меѓу Србија и Албанија, со цел да нема нереди, УЕФА одлучи да ги забрани гостинските навивачи на двата меча.
