Охридското Езеро се соочува со зголемен ризик од загадување, прекумерен риболов и урбан развој, предупредуваат еколозите и експертите на Обединетите нации. Како што објавуваат светските агенции, а пренесуваат медиумите што пишуваат на теми од областа на екологијата и заштита на животната средина, езерото што е едно од најстарите во Европа со старост од 3,5 милиони години е дом на околу 200 ендемски видови, вклучувајќи автохтони видови пастрмка.

Како особена туристичка атракција езерото претставува и значен извор на приходи, за Македонија и за Албанија што го делат езерото. Агенциите постсетуваат дека македонската страна на Езерото беше прогласена за Светско наследство на УНЕСКО во 1979 година, додека статусот светско природно наследство албанската страна го стекна во 2019 година.

Во својот извештај за 2024 година објавен порано годинава, УНЕСКО предупреди на неконтролираниот урбанистички на езерскиот брег и прекумерниот туризам. Исто така,експертите на ОН упатија предупредувања до Македонија и до Албанија дека не се спроведени мерки за надминување на постојните закани и спречување на појавата нови.

– Состојбата со заштитата на локалитетот не се подобрува и не се забележува тренд за започнување на враќање на неговиот интегритет – се наведува во соопштението на УНЕСКО.

Биологот Златко Лефков вели состојбата по однос загадувањето „постојано се влошува“ и оти тоа има негативно влијание врз автохтоните видови и биодиверзитетот на езерото.

– Некои видови кои претходно беа ретки или ги немаше … сега го заземаат животниот простор на биолошки важните или автохтоните андемски видови –  вели тој.

Според официјални податоци, пишуваат агенциите, во областите околу езерото вклучувајќи ги градовите Охрид и Струга на македонската страна и Поградец во Албанија, сега живеат околу 170 илјади луѓе, што е заголемување за 56 проценти за последните 50 години.

– Локалните субјекти посочуваат на потребата од инвестиции во Колекторскиот систем за собирање и третман на отпадните води изграден во 1980-тите, бидејќи тој повеќе не може да се справи со притисокот што произлегува од големиот број туристи кои го посетуваат езерото како поевтина алтернатива на морето. Постојат предлог-проекти … но државата мора да најде средства за да ги реализира овие предлози – вели Орхидеа Тасевска, директорката на Хидробиолошкиот институт во Охрид.

Екологистите, исто така, предупредуваат дека реките кои се вливаат во Езерото Охрид и помалите крајбрежни населби се постојан извор на загадување.

За жал, секојдневно од страна на граѓаните и еколошките друштва, во јавноста се посочуваат низа директни загадувачи на овој наш бисер. Истовремено се укажува и на немарноста на самите жители на Охридскиот регион, како и неагилноста на надлежните институции што може да доведе до сериозно нарушување на екосистемот и неповратно загадување на Охридско Езеро, на што укажа и мониторинг тимот на УНЕСКО.