Во наредните години, климатските промени сè повеќе ќе влијаат на бизнисот на одгледувачите на хмељ во главните европски региони каде се одгледува ова растение, кое е клучно за производство на пиво, покажа истражувањето.
И количината на собраниот хмељ и неговата содржина на алфа-киселина, клучна за горчливиот вкус на пивото, во просек ќе бидат многу помали отколку во минатото.
Меѓународниот тим што ја спроведе студијата, објавена во списанието Nature Communications, повика на „итни мерки за адаптација“.
Експертите сметаат дека ќе бидат потребни поголеми површини за одгледување.
Тие проучувале пет области за одгледување хмељ, вклучувајќи три града во јужна Германија и два региони во Чешка и Словенија.
Истражувачите очекуваат една третина помалку алфа киселина по хектар обработено земјиште помеѓу 2021 и 2050 година во споредба со приносите од 1989 до 2018 година.
Во Халертау, најважната област за одгледување хмељ во Европа, се очекува нивото на киселина да се намали за речиси 40 проценти.
Тимот истражувачи, предводен од Мартин Мозни од Чешката академија на науките во Брно, вели дека веќе е забележан значителен пад со анализите спроведени за време на неодамнешните жетви.
Научниците го припишуваат овој развој на сè повисоките температурни вредности и помалку врнежи.
Иако локалните експерти за производство на хмељ беа делумно критични кон студијата, некои од нив самите забележаа промени во алфа киселината.
„Резултатите од истражувањето се совпаѓаат со нашето лично искуство“, рече Ерих Лемар од Германското здружение на одгледувачи на хмељ (ХВГ Германија).
Директорот на најголемиот светски трговец со хмељ Барт-Хаас, Томас Рајзер, вели дека цврсто верува дека новите сорти и методи на одгледување ќе успеат да ја одржат конкурентноста на одгледувањето хмељ во јужна Германија.
