Многу се очекуваше од лондонскиот премиерлигаш Тотенхем откако трофејниот италијански стручњак Антонио Конте седна во менаџерското столче, но на крајот, не постигна никаков позначаен резултат.
Конте на средината од актуелната сезона реши да поднесе оставка со образложение дека е разочаран од играта и формата на неговите избраници. Иако најави дека ќе земе малку подолг одмор, италијанските медиуми открија дека трофејниот стручњак веќе ја договорил новата работа и дека побрзо од предвиденото ќе седне во тренерското столче.
- Милан сигурно на крајот од сезоната ќе стави крај на соработката со Стефано Пиоли. Сопственикот, Кардинале, веќе ги разгледува новите опции, а најблиску до тренерската позиција е Антонио Конте, тврдат италијанските медиуми.
Сосема очекувано, на Конте најмногу му одговара фудбалот кој се игра во Серија А, особено поради неговата омилена формација 3-5-2.
Во своите витрини има голем број на пехари, четири пати беше шампион на Италија, еднаш на Англија, два пати го освојуваше италијанскиот Супер Куп, а славеше во англискиот ФА Куп.
Тренерската кариера ја започна во 2005 година како помошен тренер во Сиена, а една година подоцна беше предводник на Арецо. После Арецо беше тренер на Бари и Аталанта. Потоа ја предводеше Сиена и Јувентус. По успешната авантура во Торино, Конте беше именуван за селекрот на Италија, а потоа беше менаџер на Челзи, тренер на Интер и менаџер на Тотенхем.
Сигурно, најверните фанови на Интер ќе го дефинираат како предавник доколку ја прифати понудата на Милан, но тоа не е нешто спектакуларно ако се знае дека веќе го има „предадено“ Јувентус и Челзи.
