Индија до крајот на овој месец ќе стане најнаселена земја во светот, надминувајќи ја Кина, објавија Обединетите нации (ОН).
До крајот на април, населението на Индија се очекува да достигне 1,425 милијарди, што значи дека ќе се совпадне и потоа ќе ја надмине Кина, се вели во соопштението на Одделот за економски и социјални прашања на ОН.
Индиската влада, која нема спроведено попис од 2011 година, официјално не ги коментираше проценките. Пресвртницата покренува прашања за тоа дали Индија може да го повтори економскиот успех што ја направи Кина централна во светската економија и водечка глобална сила.
Веста доаѓа кога Индија се промовира себеси како нов меѓународен играч како домаќин на овогодинешниот самит на Групата 20 и станува поатрактивна дестинација за компаниите кои сакаат да станат помалку зависни од Кина.
„Кина наскоро ќе се откаже од својот долг статус на најнаселена земја во светот“, соопшти ОН, истакнувајќи дека не е можно да се одреди точниот датум кога Индија ќе ја надмине Кина според бројот на жители.
Во соопштението се вели дека кинеското население го достигнало врвот во 2022 година, а потоа почнало да опаѓа, а некои предвидувања велат дека би можело да падне под милијарда. Сепак, индиската економија се уште е далеку зад кинеската.
Двете земји имаа речиси еднаков приход по глава на жител во 1970 година, но денес бруто домашниот производ на Кина е 12.556 долари по лице, во споредба со 2.256 долари во Индија, според податоците на Светската банка од 2021 година.
