Уште пет грчки региони од денеска се во темно црвена боја, односно во петтата категорија на епидемиолошката мапа на Грција, а речиси половина од земјата е токму во оваа зона, јави дописничката на МИА од Атина.
Епидемиолошката мапа на Грција има пет степени, а последниот, со темно црвена боја е за регионите со влошена ситуација.
Темно црвена е речиси цела северна Грција, но и делови од Пелопонез, додека пак во првата, зелена зона се поголемиот дел од грчките острови.
Мапата се ажурира еднаш седмично, а за категоризација на регионите се земаат предвид различни епидемиолошки податоци, како што се: просечниот број нови случаи на 100.000 жители во период од седум дена, број на случаи во период од 14 дена, позитивни случаи од направени тестови, возраст на заразените, како и имунизациската покриеност.
Од минатиот вторник, Грција бележи речиси секојдневно зголемување на новите случаи на Ковид-19, а вчера беа регистрирани 8.613 новозаразени што беше и нов негативен рекорд од почетокот на пандемијата.
