Вкупно 38 патници загинаа, а 29 преживеаја во средата откако авион на Азербејџан ерлајнс на летот од Баку за Грозни се урна при обид за принудно слетување во близина на градот Актау во Казахстан. Истрагата за падот на летот 8432 сега ќе се фокусира на видот на оружјето што го предизвика инцидентот, потврди денеска Рашад Набиев, министер за дигитален развој и транспорт на Азербејџан, откако разговараше со преживеаните во соседен Казахстан.
Во четвртокот, извори од азербејџанската влада потврдија за Euronews дека првичната истрага открила дека руски ракетен систем земја-воздух истрелал проектил кон авионот во средата додека летал над Чеченија.
Авионот од типот „Ембраер 190“ летал од главниот град Баку за Грозни, регионалниот главен град на руската република Чеченија. За време на летот, авионот се урнал додека се обидувал принудно да слета во градот Актау во југозападен Казахстан.
Изворите велат дека и покрај барањата на пилотот за итно слетување, на авионот не му било дозволено да слета на руските аеродроми, поради што бил принуден да се пренасочи кон казахстанскиот град преку Каспиското Море.
Официјалната истрага за несреќата се уште не е завршена. Сепак, преживеаните им рекоа на властите дека слушнале три експлозии кои се чини дека доаѓале однадвор додека авионот летал над Грозни.
„За време на нашата посета на преживеаните, вклучително и оние со руско државјанство, сите без исклучок изјавија дека слушнале три експлозии кога авионот бил над Грозни“, изјави Набиев за порталот „AnewZ“ од Баку.
„Тие изјавија дека овие звуци доаѓаат однадвор, што сугерира дека авионот бил под надворешно влијание“, додаде тој.
Една стјуардеса се здобила со повреди на раката, додека друга патничка се здобила со повреди на рацете и нозете како резултат на експлозиите, додаде Набиев.
„Другите слики покажуваат дупки на крилото на авионот, како и разни знаци на оштетување во внатрешноста на авионот, особено во внатрешните делови, што укажуваат на удар на остри надворешни предмети“, објасни тој и продолжи:
„Нашиот истражен тим, заедно со воздухопловните експерти ангажирани во овој случај, сега ќе испитуваат каков тип на оружје, поточно каков проектил е користен.
Авиокомпаниите одбиваат летови над Русија
Во петокот, Азербејџан ерлајнс објави дека ќе ги прекине летовите од Баку до седум руски аеродроми, вклучувајќи го и Грозни, додека не бидат објавени конечните резултати од истрагата за несреќата.
Покрај тоа, казахстанскиот „Qazaq Air“ објави дека ќе ги прекине летовите од Астана до Екатеринбург, повикувајќи се на тековната проценка на ризикот на летовите за Русија.
Израелската компанија „Ел Ал“ објави дека летовите од Тел Авив до Москва ќе бидат откажани оваа недела поради „развојот на ситуацијата во рускиот воздушен простор“. Москва остана цврста во врска со извештаите и тврдењата на воздухопловните експерти дека авионот можеби бил погоден од руска ракета за воздушна одбрана.
Во петокот, шефот на руската авијација рече дека нападот со украинско беспилотно летало бил во тек во регионот на Чеченија во моментот кога азербејџанскиот авион се обидел да слета пред да сврти кон Казахстан и таму да се урне.
