Русија го нападна енергетскиот систем на Украина и градовите во источниот регион со крстаречки и балистички ракети во средата наутро, соопштија украинскиот министер за енергетика и локалните власти.
Најмалку шест лица се ранети во ракетниот напад врз Харков во североисточна Украина во средата, изјави градоначалникот Ихор Терехов.
Украинските воздухопловни сили соопштија дека Харков бил нападнат со балистички ракети, а регионалниот гувернер, Олех Синијехубов, на апликацијата Телеграм изјави дека „цивилната нестанбена инфраструктура е оштетена“.
Половина милион луѓе во Харков без струја и вода
Малку подоцна ја потврди застрашувачката вест – половина милион луѓе во вториот по големина украински град останаа без струја, а дури 520.000 граѓани без греење и вода.
Во рускиот напад загина 53-годишна жена.
Гувернерот на Днепропетровск Серхиј Лисак на Телеграм изјави: „Руската армија од утрото силно го напаѓа реонот на Днепар. Тој се обидува да го уништи електроенергетскиот систем во регионот“.
Украинскиот министер за енергетика, Герман Галушченко, на Фејсбук изјави дека Русија „силно го напаѓа енергетскиот сектор“ и дека операторот вовел ограничувања за да ја минимизира штетата.
Украинската војска во средата прогласи воздушна тревога низ целата земја како одговор на руското лансирање на крстосувачки ракети.
Зборуваше и Володимир Зеленски
Украинскиот претседател Володимир Зеленски одговори на руските напади што се случија на Божиќ.
– Секој голем руски удар бара време да се подготви. Тоа никогаш не е спонтана одлука. Тоа е свесен избор не само на целите, туку и на времето и датумот. Путин намерно го избра денешниот Божиќ за напад. Што може да биде понечовечно од тоа? Повеќе од 70 проектили, вклучително и балистички, и повеќе од сто дронови, а целта е нашиот енергетски сектор. Нивната цел е да ја уништат електричната енергија во Украина – рече Зеленски.
Оперативната команда на вооружените сили на Полска, членка на НАТО, соопшти дека подигнала борбени авиони како одговор на заканата од руските ракети во западна Украина.
