Рускиот претседател Владимир Путин во неделата се состана во Кремљ со словачкиот премиер Роберт Фицо, што е ретка посета на лидер на Европската унија на Москва, во време кога договорот со кој се дозволува транзит на руски гас преку Украина е при крај.
Словачка, која зависи од гасот што минува низ нејзиниот сосед Украина, ги засили напорите да ги зачува тие текови од 2025 година, истовремено критикувајќи го украинскиот претседател Володимир Зеленски за одбивањето да го продолжи договорот што истекува на крајот на годината.
Словачкиот премиер Роберт Фицо изјави дека рускиот претседател Владимир Путин најавил дека Русија е подготвена да продолжи со испораките на гас за Западот.
„Рускиот претседател Владимир Путин ја потврди подготвеноста на Русија да продолжи со испораките на гас за Запад и Словачка, што е практично невозможно по 1 јануари 2025 година, со оглед на позицијата на украинскиот претседател“, напиша Фицо на својата Фејсбук страница.
Фицо, кој вчера разговараше со Путин во Москва, истакна дека неговата посета на Русија е реакција на изјавите на украинскиот претседател Володимир Зеленски, кој се противи на транзитот на руски гас преку Украина.
Портпаролот на Кремљ, Дмитриј Песков синоќа изјави дека нема да има официјално соопштение од средбата меѓу Путин и Фицо.
