Мал авион со 10 луѓе се урна во продавници во центарот на туристичкиот град Грамадо на југот на Бразил во неделата, соопштија официјални лица, а првичните извештаи покажаа дека нема преживеани, пренесува Си-Ен-Ен.
„За жал, првичните извештаи покажуваат дека патниците во авионот не преживеале“, рече гувернерот Едуардо Леите во објава на социјалната мрежа X, пренесе Си-Ен-Ен.
Според информациите од канцеларијата за јавна безбедност на државата Рио Гранде до Сул, најмалку 15 лица се пренесени во болница, а повеќето од нив се повредени поради вдишување чад предизвикан од пожарот што уследи по несреќата.
Според извештаите, авионот прво удрил во оџакот на една зграда, а потоа во вториот кат од една куќа, пред да удри во продавница за мебел, соопштија властите. Урнатините стигнале и до блискиот куќи.
Градот Грамадо, кој се наоѓа во планински регион, е најпопуларната туристичка дестинација во државата Рио Гранде до Сул, која на почетокот на оваа година беше тешко погодена од невидени поплави кои однесоа десетици животи, уништија инфраструктура и значително ја оштетија економијата на државата .
Несреќата се случила само неколку дена пред Божиќ, во особено напорен период за градот, кој традиционално е украсен и домаќин на бројни свечени настани.
