Ерик и Лајл Менендез, браќата кои ги убиле своите богати родители во нивната вила на Беверли Хилс во 1989 година, би можеле да бидат ослободени по повеќе од 30 години затвор.
Браќата Менендез се појавија на суд во понеделникот преку телеконференција, нивното прво појавување на сослушување по неколку години, за да ги дознаат следните чекори во врска со нивното барање за ослободување, пишува Би-Би-Си, а пренесува РТС.
Неколку членови на семејството Менендез сведочеа за време на сослушувањето во понеделникот за ослободување на браќата.
Луѓето почнаа да се собираат пред судот повеќе од пет часа пред почетокот на рочиштето.
Новите докази, како и популарноста на документарната серија на Нетфликс, го поттикнаа јавниот интерес за случајот. Во судницата имаше само 16 места за неколку десетици граѓани кои сакаа да присуствуваат на рочиштето. На скалите на судот беше организирана лотарија за избор на лицата кои ќе присуствуваат на судењето.
Клучен елемент на одбраната на браќата се нивните тврдења дека биле сексуално злоупотребувани.
Случајот за двојното убиство во 1989 година, што ги прогонува САД со децении, беше повторно отворен оваа есен кога окружниот обвинител во Лос Анџелес го потврди барањето на браќата за нова казна. Овој потег би можел да им овозможи веднаш да бидат ослободени – доколку судијата и одборот за условно ослободување го одобрат тоа.
Судијата на Врховниот суд го одложи рочиштето во понеделникот, велејќи дека сака да се слушне со новиот окружен обвинител кој ја презема функцијата на почетокот на декември.
Браќата го признале убиството, но со тврдење дека го извршиле во самоодбрана. Тие зборуваа за долгогодишно емоционално, физичко и сексуално злоставување, за што го обвинија нивниот татко, холивудски музички и филмски продуцент.
Тие пред судот изјавија дека се соочиле со родителите за сексуално злоставување, дека имало агресивна пресметка и дека верувале дека нивните родители планирале да ги убијат. Обвинителите тврдеа дека нивниот мотив биле парите, поточно имотот на нивните родители од 14 милиони долари.
Браќата Ерик (53) и Лајл (56 години) се во затвор во Калифорнија, каде отслужуваат доживотни затворски казни без можност за условно ослободување.
