Британскиот министер Пет Мекфејден планира денеска да се обрати на конференцијата на НАТО во Лондон за руските напади во сајбер просторот, пишува „Би-Би-Си“. Тој наводно ќе порача дека „Москва нема да размисли два пати да ги таргетира британските компании“.
„Заканата е реална. Минатата година, руската војска и нејзината неофицијална армија од сајбер криминалци и хакери не само што ги зголемија своите напади, туку и ги проширија своите цели за да вклучат бројни членки и партнери на НАТО. Овие групи се непредвидливи, дејствуваат без оглед на потенцијалните геополитички последици и со само една погрешна проценка би можеле да направат хаос на нашите мрежи“, пишува во неговиот говор.
Тој, исто така, планира да ја повика руската воена единица – позната како Единица 29155 – која наводно извршила сајбер напади во Обединетото Кралство и Европа. Во својот говор тој наводно ќе зборува и за руските тактики за напад каде што милиони луѓе ќе останат без струја.
Русија е подготвена да изврши бран сајбер напади врз инфраструктурата и бизнисите во Обединетото Кралство, потенцијално исфрлајќи ги електричните мрежи и оставајќи милиони луѓе без струја, откако украинските сили употребија ракети „Storm Shadow“ за да нападнат длабоко на руска територија, пишува и британски „Телеграф“.
Украина со месеци ги повикува западните земји да дозволат напади врз воени бази и аеродроми во Русија, поради руските воздушни напади и офанзиви во регионите Доњецк и Харков.
Сепак, сојузниците на Украина продолжија да ја ограничуваат употребата на оружјето со долг дострел, како што се ATACMS и Storm Shadow, наводно за да избегнат понатамошна ескалација.
Минатата недела американскиот претседател Џо Бајден и даде зелено светло на Украина да користи ракети со долг дострел. Неодамна имаше информации дека Украина употребила ракети „Storm Shadow“ за да го погоди штабот на руските и севернокорејските генерали.
