Познатиот руски ТВ готвач Алексеј Зимин (52), кој отворено се спротивстави на војната во Украина, а потоа живееше во егзил во Лондон, е пронајден мртов во Србија. Како што дознава Новости, тој починал откако му пукнала проширената аорта меѓу хранопроводот и желудникот и предизвикало внатрешно крварење. Веќе некое време бил болен од цироза на црниот дроб. Зимин бил пронајден како лежи на подот, а на телото немало траги на насилна смрт.
Неговиот пријател од Русија сега сподели повеќе детали за Алексеј.
Кој е Алексеј Зимин?
Алексеј Зимин имаше 52 години. Тој беше новинар, писател, готвач, угостител и едукатор. Го основал култното гастрономско списание „Афиша еда“, бил главен уредник на списанијата GQ и Gourmet, водел исклучително интересни кулинарски емисии на телевизија и отворил неколку клучни ресторани во Москва, меѓу кои и Рагу. Од 2015 година, Зимин развива угостителски бизнис и медиумски проект Зима во Лондон, а во 2022 година трајно се пресели од Русија.
Неговиот пријател, Иван Шишкин, сподели за магазинот Медуза дека многу луѓе го нарекуваат Алексеј „нашиот Џејми Оливер и Ентони Бордеин“.
„Добив порака за тоа околу 3:30 часот наутро и оттогаш не спијам, тажен сум. Секогаш е тажно кога добрите луѓе заминуваат први. Тој беше човек со голема душа и широки интереси. Покрај него чувствував изобилство, богатство на присуство. Каде и да беше, ќе станеше централна фигура. Можеше да зборува тивко, речиси срамежливо, па мораше да се напрегаш за да го слушнеш. И тогаш одеднаш ја започнуваше песната со полн глас, така што светилките се тресеа“, се присетува Иван, а потоа додаде:
„Никогаш не работевме заедно – ќе беше тешко бидејќи бевме многу различни луѓе. Сепак, се движевме во слични кругови, и беше возбудливо, интересно, дури и опасно! Знаеше да го живее животот до крај, а тоа е уметност. Знаеше да ужива во јадењето, пиењето и смеењето, сето тоа со мерка која не се претвори во хаос, туку во песна. Тоа беше посебен подарок, да се земе најмногу од животот и да се остане достоинствен. Беше многу љубопитен. Се сеќавам кога го отворивме ресторанот Delicatessen во Москва, додека тој раководеше со Рагу. Тој дојде со Иља Шаљев, готвач и ко-основач на Рагу. Седнаа, јадеа, тивко разговараа, а потоа ми викаа: „Не можам повеќе! Покажи ми ја кујната!” Секогаш сакаше да знае повеќе и постојано учеше.
Тој раскажа и каква врска имале во последно време, откако Алексеј се преселил од Русија.
„По почетокот на инвазијата на Украина, првпат разговаравме на телефон на 8 март 2022 година. Бев во Берлин со моето семејство, а тој ја поддржуваше Украина и беше категорично против војната. Таков човек не може да биде милитарист; тој беше сосема поинаков, апсолутно против агресијата. Разговаравме од време на време и констатиравме дека нема смисла да се враќаме во Русија бидејќи таму нема да биде подобро. Ни преостанува само да ги мразиме оние што уништуваат туѓи животи“, рече тој.
„Гледав на него како на редок феномен, на личност која во своите 52 години успеа да постигне толку многу, колку што малкумина можеа. Неговото изобилство и присуство се чувствуваше во нашата сфера, а сега остана празнина на патот што ни го постави“.
Сопственик на елитен светски ресторан и ТВ ѕвезда пронајден мртов во стан во Белград!
