Генералниот секретар на Обединетите нации Антонио Гутереш остро го осудува севернокорејското лансирање на балистичка ракета со долг дострел, што е јасно кршење на резолуциите на Советот за безбедност на ОН, изјави денеска портпаролот на ОН Стефан Дижарик.
„Генералниот секретар сè уште е загрижен за ситуацијата на Корејскиот Полуостров. Дипломатскиот ангажман останува единствениот пат кон одржлив мир и целосна и проверлива денуклеаризација на Корејскиот Полуостров“, се вели во изјавата на Дижарик.
Северна Кореја денеска потврди дека тестирала интерконтинентална балистичка ракета, а на лансирањето присуствувал и лидерот на таа земја Ким Џонг Ун, пренесоа севернокорејските медиуми, пренесува Танјуг.
Тој рече дека тестирањето на оваа ракета е предупредување за непријателите на Северна Кореја, пишува КЦНА.
