Јавноста во Босна и Херцеговина е во шок, откако малолетник, на возраст под 15 години, влегол во полициската станица во Босанска Крупа, извадил нож, а потоа убил еден и ранил уште еден полицаец. Овој чин Обвинителството на Унско-санскиот кантон го окарактеризира како терористички.
На социјалните мрежи нема ниту една фотографија од малолетниот убиец, но има бројни натписи на арапски, пишува Аваз. На неговиот Инстаграм профил пишува „Кажи ја вистината, во името на Алах, додека не те убијат“.
По терористичкиот напад во полициската станица во Босанска Крупа, се вршат апсења, претреси и проверка на контактите на малолетниот напаѓач. Во врска со нападот уапсени се осум лица. Полицијата во Босна и Херцеговина стапила во контакт со ЕВРОПОЛ за да добие информации од социјалните мрежи што ги користел напаѓачот. Се проверува и поврзаноста на напаѓачите со радикални исламски организации.
Во терористички напад на полициската станица во Босанска Крупа во БиХ загина полицаецот Озрен Маран, а беше ранет уште еден полицаец Авдо Хасановиќ.
Според соопштението на МВР на Унско-санскиот кантон, седум лица се уапсени во Босанска Крупа, а едно лице е уапсено во Бихаќ.
Кај нив е пронајдено одредено количество оружје, одземени се компјутери, телефони, лаптопи, пари, УСБ мемориски стикови, како и поголем број хартии напишани на арапски јазик“, се вели во соопштението на Министерството за внатрешни работи.
Обвинителството во Босна и Херцеговина ниту ги демантираше ниту ги потврди наводите дека нападот бил верски мотивиран и поврзан со вахабистичкото движење. Експертите велат дека нападот врз полицајците уште еднаш покажува дека радикалните исламисти во Босна и Херцеговина не мируваат, пишува РТС.
Слободан Жупљанин, декан на Факултетот за безбедност и заштита во Бања Лука, вели дека „во Босна и Херцеговина има радикални групи, тие главно се „врткаат“ околу вахабистичката и салафиската заедница, околу параџаматите кои малку по малку излегуваат на виделина и „ќе направат одредени инциденти“.
„Кога зборуваме за тоа, сите од БиХ, особено од федерацијата, негираат, а кога ќе се случи ваков инцидент, сите заедно имаме проблем“, додава Жупљанин.
Армин Халитовиќ, градоначалникот на Босанска Крупа ги повика граѓаните да останат смирени и да ги следат медиумите кои известуваат вистинито и објективно. Да се воздржиме од коментари кои не се проверени, особено коментари на социјалните мрежи каде во последно време полудуваме, се со цел истрагата што поскоро да се заврши“, побара градоначалникот на Босанска Крупа.
Припадниците на вахабистичкото движење се внимателно следени од српската полиција, особено по терористичкиот напад врз израелската амбасада во јуни во Белград, кога беше тешко ранет припадник на Жандармеријата, а потоа и убиството на припадникот на тоа движење, Сенад Рамовиќ, во близина на Нови Пазар. Министерот за внатрешни работи тогаш рече дека следеле околу 100 припадници на вахабистичкото движење за кои се проценува дека може да бидат опасни.
