Конфедерацијата на синдикалните организации во Македонија (КСОМ) истакнува дека во последно време има сериозни прекршувања на законите од страна на сопственици на компании, во однос на правото на работниците за синдикално организирање, како и зголемен притисок од директорите врз работниците, преку институции, насочен кон гасење на синдикалните организации, од кои дел се од КСОМ. Доколку продолжи притисокот, најавуваат протести пред седиштата на компаниите што го прават тоа и се надеваат на поддршка и од другите синдикати.
Ваков притисок врз работниците, како што велат, има во повеќе градови, а некаде дури и ги тераат, преку нотарска изјава, да потврдат дека не сакале да формираат синдикат. Притисок да не се формираат синдикални организации, како што посочуваат, досега вршеле повеќе од 40 работодавци, најчесто од градежниот сектор и оние што управуваат со минералните суровини.
– Одредени работодавци, особено во приватниот сектор, синхронизирано и организирано, без да избираат средства, вршат големи притисоци врз работниците за да не се организираат синдикално, дури и во некои компании каде што имаме ние свој синдикат. Тоа го прават преку разни комисии, кои даваат приговори на првостепена, а потоа и на второстепена комисија, за да дојде до згаснување на синдикатите, а на крај, дури и до Управниот суд. Додека Управниот суд донесе одлука, може да потрае и до три години, а во тој период не смее да се формира нова синдикална организација – истакна претседателот на КСОМ, Марјан Ристески, и праша што им пречи на работодавците ако работниците се синдикално организирани и ги бараат своите права.
На следниот состанок на Економско-социјалниот совет, КСОМ ќе побара помош за тоа и од премиерот.
Тој посочи дека на работодавците, покрај тоа што не им чинат работниците бидејќи биле неспособни и непродуктивни, не им чини и Владата, која само што е формирана. Според него, тоа, најверојатно, е притисок за да не се потпишат колективните договори.
– Работниците немаат никакви права во приватниот сектор. Ако се продолжи со овој притисок, работниците ќе избегаат од Македонија, а дури и работниците што доаѓаат од странство, за неколку дена ја напуштаат државава. Сакаме да седнеме со работодавците и со стопанските комори и да разговараме, бидејќи не може ним ништо да не им чини во државата, а даваат минимални плати и ја изигруваат обврската за исплата на К-15. Капиталот, коморите, работодавците и синдикатите што беа досега, се највиновни што сме доведени во ваква состојба. Тие се навикнати само да се жалат, а ние, како работници, не добиваме ништо – потенцира Ристески.
Нагласи дека ќе побараат од Владата оние компании што имаат синдикат, да имаат одреден приоритет при добивањето субвенции и програми за инвестиции, а од коморите да си ги дисциплинираат своите членки. Смета дека проблемот не го прават сопствениците на мултинационалните компании, кои знаат што е синдикално организирање кај нив, туку раководните лица кои се поставени од нашата држава и кои, како што рече, им велат на газдите, ние го знаеме менталитетот на работниците и знаеме како треба да се постапува со нив.
– Тоа, покрај потценување на работниците, е и потценување на државата. Затоа треба да го кренеме гласот и, конечно, работникот да се чувствува дека е почитуван во државата и да не се сели – потенцира Ристески.
